Երևան քաղաքի ընդհանուր իրավասության դատարանում՝ նախագահությամբ դատավոր Մնացական Մարտիրոսյանի, քիչ առաջ սկսվեց Ազգային ժողովի նախկին պատգամավոր, գեներալ Մանվել Գրիգորյանի գործով դատական նիստը, որում քննվում է նրա խափանման միջոց կալանավորումը փոխելու նպատակահարմարության հարցը:

Դատական նիստի մեկնարկին դատավոր Մնացական Մարտիրոսյանը հայտնեց, որ առողջական ծանր վիճակով պայմամավորված՝ Գրիգորյանը չի ներկայացվել դատարան:

Դատական նիստ անցկացնելու նախաձեռնությամբ հանդես է եկել գլխավոր դատախազությունը, որն այսօր ավելի վաղ գրություն է մուտքագրել դատարան՝ հայտնելով, որ «Նաիրի» բժշկական կենտրոնից, որտեղ ստացիոնար բուժում է ստանում Մանվել Գրիգորյանը, գրություն են ստացել Մանվել Գրիգորյանի առողջական վիճակի վերաբերյալ:

Թեև քրեական գործով հերթական դատական նիստը հունվարի 21-ին է, դատախազությունը, հաշվի առնելով ամբաստանյալի առողջական վիճակի կարևորությունը, առաջարկել է նշանակել արտահերթ դատական նիստ: Դիմումը ստորագրված է ավագ դատախազ Վահե Դոլմազյանի կողմից:

Դատախազության առաջարկով այսօրվա դատական նիստին հրավիրվել էր նաև Մանվել Գրիգորյանի նկատմամբ նշանակված միջգերատեսչական հանձնաժողովային փորձաքննության նախագահ Գագիկ Հարությունյանը:

Վերջինս հայտնեց, որ ներկայում ի հայտ է եկել Մանվել Գրիգորյանի սրտի առողջական վիճակի հետ կապված բարդացում, որը բժշկական տեսանկյունից ոչ ցանկալի բարդություն է, կարող է հանգեցնել անկանխատեսելի հետևանքների՝ ընդհուպ կյանքին վտանգ սպառնացող: