Պուտինը Ռուսաստանի վարչապետի պաշտոնում առաջադրել է հարկային ծառայության պետի թեկնածությունը
Ռուսաստանի Դաշնության նախագահ Վլադիմիր Պուտինը երկրի վարչապետի պաշտոնում առաջադրել է Դաշնային հարկային ծառայության պետ Միխաիլ Միշուստինի թեկնածությունը։
«Նախագահ Վլադիմիր Պուտինը աշխատանքային հանդիպում է ունեցել Միխաիլ Միշուստինի հետ և նրան առաջարկել է ստանձնել կառավարության ղեկավարի պաշտոնը։ Համաձայնությունը ստանալով՝ Պուտինը վարչապետի պաշտոնում Միշուստինի թեկնածությունը ներկայացրել է Պետդումայի քննարկմանը»,- ասվում է Կրեմլի տարածած հաղորդագրությունում։
Վլադիմիր Պուտինն արդեն իսկ ստորագրել է կառավարության հրաժարականի մասին հրամանագիրը, միևնույն ժամանակ Դմիտրի Մեդվեդևին նշանակելով՝ վարչապետի ժամանակավոր պաշտոնակատար։ Կառավարությանը հանձնարարվել է կատարել իրենց պարտականությունները՝ մինչև նախարարների նոր կաբինետի ձևավորումը։
Հիշեցնենք, որ այսօր Դաշնային ժողովում Պուտինի ուղերձից հետո հանդիպում է կայացել ՌԴ նախագահի և կառավարության անդամների միջև, որի ընթացքում վարչապետ Դմիտրի Մեդվեդևը հայտարարեց, որ կառավարությունն ամբողջ կազմով հրաժարական է տալիս։
53-ամյա Միխաիլ Միշուստինը Դաշնային հարկային ծառայությունը ղեկավարում է 2010 թվականից։ Մինչ այդ նա ակտիվների կառավարման գծով UFG ընկերությունների խմբի նախագահն էր։
2004-2006 թվականներին Միխաիլ Միշուստինը զբաղեցնում էր անշարժ գույքի կադաստրի դաշնային գործակալության ղեկավարի, իսկ 2007-2008թթ․ հատուկ տնտեսական գոտիների կառավարման հարցերով դաշնային գործակալության ղեկավարի պաշտոնները։
Մեկնաբանել