«Հետք»-ի հարցերին պատասխանում է Ալավերդի խոշորացված համայնքի ղեկավար Սասուն Խեչումյանը:   

-Լոռու մարզպետ Անդրեյ Ղուկասյանը վերջին օրերին լրատվամիջոցներով Ձեզ առաջարկում է հրաժարական տալ Ալավերդի համայնքի ղեկավարի պաշտոնից: Ձեզ հետ քննարկվե՞լ է մարզպետի առաջարկությունը: 

- Այո, հայտարարելուց մի երկու օր առաջ նա ինձ առաջարկել է հրաժարական տալ համայնքի ղեկավարի պաշտոնից: Ես իրեն պատասխանել եմ, որ ես նախ համայնքի բնակչությանն եմ հաշվետու: Իմ անձնական դիրքորոշումն եմ ասել  այն մասին, որ Ալավերդի համայնքի ղեկավարի ընտրություններին ինձ քվեներ տված 7 հազար ընտրողները կարող են ինձանից հրաժարական պահանջել: Այլ դեպքում անազնիվ կլինի հրաժարվել համայնքի ղեկավարի պաշտոնից:

-Անդրեյ Ղուկասյանը Ձեզ հրապարակային մեղադրում է, որ դուք համայնքի ղեկավարի պաշտոնում ոչ թե գործող իշխանության, այլ նախկին մարզպետ Արթուր Նալբանդյանի և մյուս հանրապետականների կողմից եք ուղղորդվում և ղեկավարվում: Ինչպե՞ս կմեկնաբանեք դա:

–Ես չեմ կարող դրան գնալ ոչ իմ պետության, ոչ իմ հանդեպ, ոչ էլ համայնքի բնակչության հանդեպ: Ոնց կարող են նրանք ինձ ուղղորդել կամ ղեկավարել: Իհարկե, քննադատելու համար միշտ ինչ-որ թիրախ պետք է գտնեն: Ով չգիտի, որ ես ինքնառաջադրմամբ չեմ առաջադրվել համայնքապետի թեկնածու:

-Ինչպես ԱԺ պատգամավոր Արեն Մկրտչյանը, այնպես էլ լրատվամիջոցները Ձեզ մեղադրում են համայնքի բյուջեի եկամուտները անարդյունավետ ծախսելու մեջ: 

-Բյուջեի ծախսերի անարդյունավետության մասին ես կասեմ, որ համայնքի բնակչության համար տեսանելի չէ մեր բյուջեի ծախսերը: Մեր մակարդակի համայնքներից ոչ մի համայնք 19 ՀՈԱԿ-ներ չունի: Դրանցից 9-ը նախադպրոցական ուսումնական հաստատություններ են: ՀՈԱԿ-ները տանում են մեր բյուջեի առյուծի բաժինը: Բնակչությունը տեսնում է, որ մենք 2020թ.-ի բյուջեում նախատեսել ենք ունենալ 644 մլն դրամ եկամուտ: Մարդիկ հաշվարկում են, որ այս կամ այն բանը պետք է լինի, բայց չեն հաշվարկում մենք դրա հնարավորությունը ունենք, թե ոչ:

-Դուք բյուջեի հանրային քննարկմանը ներկայացնու՞մ  եք համայնքի առաջնահերթ ծախսերը, թե՝ ոչ: Պատգամավոր Ա. Մկրտչյանը  պնդում է, որ Ձեր կողմից նախատեսված 150 մլն դրամ ծախսերով իրականացված սուբվենցիոն ծրագրերը համայնքի զարգացմանը չեն նպաստել:

-Ձեզ ազնիվ պատասխանելու համար ես օրինակը բերում եմ, ուրեմն բոլոր ՀՈԱԿ-ների ծնողներին հանրային լսումներով ամբողջ բյուջեն ներկայացվել է: Հավատացեք, անձամբ գնացել եմ համայնքի նախադպրոցական ուսումնական  հաստատություններ և երաժշտական դպրոցներ: Ծնողների հետ հանդիպել եմ, նրանց բոլոր հարցերին պատասխանել եմ: Բյուջեի եկամուտների և ծախսերի բոլոր տեղերը ցույց եմ տվել, որ ժողովրդի կողմից բյուջետային գործընթացներում մասնակցություն լինի:

-ԻՆչ կասեք պատգամավոր Ա. Մկրտչյանի այն դիտարկմանը, որ Ալավերդի քաղաքի վարչական տարածքում ազատ հող չկա արտադրական ձեռնարկություններ բացելու համար: Պատգամավորը նշում է, որ արտադրական նշանակության կիսաքանդ շենքերից մեկի սեփականատերը Ալավերդիում աղբատար մեքենաների հավաքման արտադրամաս բացելու համար 1 մլն դոլար է պահանջել ներդրողից: Այդ պատճառով ներդրողը Ալավերդիում չի ցանկացել իր գործը սկսել:

-Ես կոնկրետ չեմ կարող ասել պարոն Մկրտչյանի հայտարարությունը որ դեպքին է վերաբերում: Բայց իր հայտարարությունից ես էլ հասկացա, որ խոսքը վերաբերում է աղբահան մեքենաների արտադրամաս բացելուն: Քաղաքում չսեփականաշնորհված արտադրական շենք չկա: Դեբեդ թաղամասի մանկապարտեզի շենքն է, ֆինանսապես մենք ի վիճակի չենք այն վերանորոգել: Բացի դա, մանկապարտեզի շենքը արտադրական նպատակով դժվար կլինի օգտագործել: Թումանյան փողոցի վրա գտնվող նախկին պիոներ տան մեր շենքն է, որը նպատակային պահված շենք է: Ես ինքնս այդ շենքի վրա դողում եմ, որ վաղը, մյուս օրը քաղաքի համար մի կենտրոն դառնա:

-Ձեզ քննդատում են, որ դուք դիտողություններ և առաջարկություններ չեք ընդունում: Մարդկանց հետ վիճում կամ Ձեր ամբողջ թիմով ընդդիմանում եք առաջարկություն ներկայացնողին:

-Ճիշտն ասած ես գտնում եմ, որ ինձ ավելի շատ քննադատում են, որ ես  ուրիշներին լսում եմ: Անկեղծ ասեմ՝ դա այդպես է: Ես ժողովրդի մեջ մեծացած մարդ եմ, անընդհատ ժողովրդի մեջ եմ, ինձ համար հասարակական կարծիքը իմ խղճին հավասար է:

-Ինչպե՞ս եք գնահատում համայնքի փողոցների 2019թ.-ի փոսանորոգումների որակը: Մեր տեղեկություններով՝ դուք անորակ փոսանորոգումների վճարումների մի մասը արդեն կատարել եք:

-Փոսանորոգման անորակ աշխատանքների համար ես իմ դժգոհությունը և պահանջներն առանձին ունեցել եմ: Եթե դուք շինարարին հարցնեք, թե համայնքի ղեկավարը փոսանորոգման գործում ինչ պահանջներ է դրել ձեր առաջ, նա Ձեզ կասի: Մրցույթի պահանջներից մեկը եղել է այն, որ ասֆալտը պետք է նաև սերտիֆիկատ ունենա, քանի որ ասֆալտը մազութային հումքեր է պարունակում, ասֆալտապատման աշխատանքերի այլ տեխնիկայից բացի, շինարարական կազմակերպությունը պետք է ունենա փոսային աշխատանքերի տեխնիկա: Մենք այնպիսի փողոցներ ունենք, ինչպես՝ Ալավերդու Ջրավազան փողոցը, որտեղ հնարավոր չէ մեծ կատոկով աշխատել: Եթե առանց կատոկի էլ ասֆալտը լցնեն փոսերը, բնականաբար ասֆալտի խտությունը չի ապահովվի: Փոսանորոգման որակի իրական պատասխանատվությունը իմն է, բայց դե  հիմնական պատասխանատվությունը նաև շինարարինն է: Մենք կատարած աշխատանքի համար շինարարին ամբողջությամբ չենք վճարել և չենք էլ վճարելու: Մոտ 20 մլն դրամից մենք նրանց վճարել ենք ընդամենը 8,2 մլն դրամ՝ երկու փողոցի համար: 

Լուսանկարում ձախից՝ Լոռու մարզպետ Անդրեյ Ղուկասյանը, աջից՝ Ալավերդու համայնքապետ Սասուն Խեչումյանը