Փետրվարի 28-ին, Սումգայիթի ողբերգության 24-րդ տարելիցի կապակցությամբ, Սոֆիայի Երևանյան պուրակում տեղադրված հայկական խաչքարի մոտ տեղի ունեցավ պսակադրման արարողություն:

Բուլղարիայում ՀՀ դեսպանության նախաձեռնած արարողությանը ներկա էին Բուլղարիայում ՀՀ դեսպան Արսեն Սհոյանը, Բուլղարիայի Հայ առաքելական եկեղեցու Բուլղարիայի թեմի առաջնորդական տեղապահ վարդապետ Տեր Աբգար Հովակիմյանը, Սոֆիայի եկեղեցական և թեմական խորհրդի, հայկական կրթամշակութային, երիտասարդական, բարեգործական և հասարակական կազմակերպությունների անդամներ, մտավորականներ, ԶԼՄ ներկայացուցիչներ:

Արարողությունից հետո Սոֆիայի հայկական եկեղեցում Սումգայիթի զոհերի հիշատակին մատուցվեց սգո պատարագ:

ՀՀ ԱԳՆ մամուլի, տեղեկատվության և հասարակայնության հետ կապի վարչության հաղորդմամբ՝ այսօր հոգեհանգստյան պատարագներ մատուցվեցին նաև Բուլղարիայի Պլովդիվ, Վառնա, Բուրգաս քաղաքների եկեղեցիներում: