Կառավարության այսօրվա նիստի մեկնարկին վարչապետ Նիկոլ Փաշինյանը նորից անդրադարձավ սպանդանոցների խնդրին ու կրկնեց իրենց առաջարկը, որի մասին երեկ խոսել էր Ազգային ժողովում:

«Մինչև փետրվարի 6-ի նիստը կրկին ուսումնասիրում ենք սուբսիդավորվող վարկերի ծրագրերը գյուղատնտեսության ոլորտում, որոնք այսօր էլ կարող են արտոնյալ կարգով սուբսիդավորել սպանդանոցներին, պլյուս դրան՝ լիզինգային ծրագրերը, որտեղ պետք է տեղ լինի նաև շարժական սպանդանոցների համար, որ հնարավոր լինի գյուղացիների կողմից դրանք ձեռք բերել, կազմվում է Հայաստանում սպանդանոցների բաշխվածության և խտության նախընտրելի քարտեզ, և մենք հասցեական ֆինանսավորում ենք, այնպես ենք անում, որ այդ սպանդանոցներն ունենան խելամիտ բաշխվածություն, որպեսզի լինի համաչափ հասանելիություն: Այս ընթացքում ընդունում ենք առաջարկներ, որ ինչ-ինչ նրբություններով կարող ենք հարստացնել այս փաթեթը, որպեսզի առավել արդյունավետ գործի»,- ասաց Նիկոլ Փաշինյանը՝ նշելով, որ այս ամենի արդյունքում քաղաքացիների հետ պետք է պայմանավորվել, որ մինչև հուլիսի 1-ը ամենախիստ պայմաններում գործելու են միայն Երևանի սուպերմարկետներն ու Երևանում գործող հանրային սննդի օբյեկտները, իսկ մյուս տեղերում իրավիճակը թողնվի այնպես, ինչպես կար նախքան այս կարգավորումը՝ մի պայմանով, որ հուլիսի 1-ից ամբողջ հանրապետությունն անցնում է սպանդանոցային մորթի նոր համակարգին:

«Եթե այս պայմանը այսօր բողոքի գործողություններ իրականացնող մեր հայրենակիցների համար ընդունելի է, ուրեմն մենք այս որոշումը կկայացնենք: Եթե պարզվի, որ ընդունելի չէ, մենք այդ վարկային ծրագրերը բացելով՝ պետք է ասենք, որ պարտադիր պայմանն այսօրվանից է գործում: Եթե ընդունելի չէ, թող այսօրվանից ընդունելի չլինի»,- ասաց Նիկոլ Փաշինյանը:

Վարչապետը նշեց նաև, որ պետք է իրազեկել մարդկանց, թե սպանդանոցներն ինչ  պայմաններում են գործում. «Մարդիկ հաճախ չգիտեն, որ սպանդանոցներն ունեն պարտավորություն տեղափոխել մորթի ենթակա կենդանիների գլխաքանակը, եթե գլխաքանակի տերերը նման ցանկություն ունեն»,- ասաց Փաշինյանը: