Խորհրդարանում առաջին ընթերցմամբ քննարկվեց Կառավարության ներկայացրած «Վարչական իրավախտումների վերաբերյալ» և Քրեական օրենսգրքերում լրացումներ ու փոփոխություններ կատարելու օրենսդրական առաջարկը: Այս փոփոխությամբ առաջարկվում է հստակեցնել վարժական հավաքներից, զորավարժություններից խուսափող անձանց պատասխանատվությունը:

Նախագծերը ներակայացրեց Պաշտպանության փոխնախարար Գաբրիել Բալայանը: Փոխնախարարի խոսքով` անհրաժեշտությունն առաջացել է իրավական ակտերի միջև գործող անհամապատասխանությունը վերացնելու համար:

Գործող օրենքով` վարժանքներից, զորավարժություններից խուսափելու տուգանքի չափը  20 հազար դրամ է, առաջարկվում է 30 հազար դրամ սահմանել, իսկ եթե նույն արարքը մեկ տարվա ընթացքում կրկնվի, ապա տուգանքը կսահմանվի 50 հազար դրամ:

Չնայած օրենսգրքերում պատասխանատվության չափն ամրագրված է եղել, սակայն գործադիրը չի կարողացել որևէ մեկին պատասխանատվության կանչել, քանի որ չի եղել այն կիրառող մարմին:

Փոխնախարարի խոսքով` վարժական հավաքներից խուսափելը կենթարկվի քրեական պատասխանատվության, զինվորական վարժաքներից ու զորավարժություններից խուսափելը` վարչական պատասխանատվության:

«Կառավարության որոշման խախտումը ենթադրում է քրեական պատասխանատվություն, պաշտպանության նախարարի հրամանի խախտումը` վարչական պատասխանատվություն»,- ասաց Բալայանը: Փոխնախարարի խոսքով` փոփոխություններով հստակեցվում են նաև վարժանքներից բացակայելու հարգելի պատճառները:

Նախագծի հարակից զեկուցող, Պաշտպանության և անվտանգության հարցերի մշտական հանձնաժողովի անդամ Արմեն Խաչատրյանը կոչ արեց նախագծին կողմ քվեարկել` ասելով, որ այն ստացել է գլխադասային հանձնաժողովի եզրակացությունը: Խաչատրյանի խոսքով` փոփոխությունների հիմնական նպատակը իրավական ակտերի միջև գոյություն ունեցող հակասությունները վերացնելն է: