Վերաքննիչ քրեական դատարանը՝ նախագահությամբ դատավոր Մնացական Հարությունյանի, քիչ առաջ որոշեց պայմանական վաղաժամկետ ազատ արձակել ցմահ դատապարտյալ Աշոտ Մանուկյանին՝ նրա համար սահմանելով 10 տարի ժամկետով փորձաշրջան:

Հիշեցնենք, որ Մանուկյանի ազատ արձակման հարցով դատարանը խորհրդակցական սենյակ էր հեռացել երեկ՝ հունվարի 23-ին:

Աշոտ Մանուկյանն անազատության մեջ է 1996 թվականից: Մեղադրվել և դատապարտվել է երեք զինծառայողի սպանության համար:

Արդարադատության նախարարության պրոբացիոն ծառայությունը նրա ազատ արձակման վերաբերյալ դրական, իսկ քրեակատարողական ծառայությունը՝ բացասական եզրակացություն են տվել:

Հակառակ տարբերվող եզրակացություններին՝ այս երկու կառույցներն էլ Աշոտ Մանուկյանին բնութագրել են դրական: Նրան ներել են նաև տուժողների ծնողները, սակայն նման փաստերի առկայության պայմաններում առաջին ատյանի դատարանը գտել է, որ Աշոտ Մանուկյանը պետք է մնա անազատության մեջ։

Այս դատական ակտի դեմ նրա պաշտպանները վերաքննիչ բողոք էին ներկայացրել։