Ֆրանսիայի Սահմանադրական խորհուրդը հակասահմանադրական է համարում Հայոց ցեղասպանության փաստի քրեականացումը նախատեսող օրինագիծը այն դեպքում, երբ համանման օրենք արդեն ունեն հրեական Հոլոքոստի վերաբերյալ: Եթե գործում է անկեղծ իրավական մոտեցում, ապա Ֆրանսիայի Սահմանադրական խորհուրդը նմանատիպ որոշում պետք է ունենա նաև Հայոց ցեղասպանության մասին: Այն հիմնավորումները, որ նրանք ներկայացնում են, ապացուցելու համար իրենց ճիշտ լինելը, չեն կարող դիմանալ որևէ քննադատության: Այսօր լրագրողների հետ հանդիպման ժամանակ նման կարծիք հայտնեց ԵՊՀ արևելագիտության ֆակուլտետի փոխդեկան, թուրքագետ Ռուբեն Մելքոնյանը:                        

Նա նշեց, որ այս որոշման մեջ չկա անկեղծ իրավական մոտեցում: Ֆրանսիան հղում է անում խոսքի ազատությունը սահմանափակող դրույթին, բայց այստեղ խոսքը համամարդկային չարիքի մասին է:                                          

«Եթե համամարդկային չարիքի խնդիրը կապվում է խոսքի ազատությունը սահմանափակող դրույթի հետ, ապա, անշուշտ, այդ հիմնավորումը թույլ է և համոզիչ համարվել չի կարող»,- ասաց Ռուբեն Մելքոնյանը:

Նա կարծում է, որ այս գործընթացում կա քաղաքական խաղ:

«Հայոց ցեղասպանության փաստը որպես խաղաքարտ  շահարկվում է ֆրանս-թուրքական հարաբերությունների կարգավորման համար: Ցավոք, այս փաստը դարձել է քաղաքականացված խնդիր, և տարբեր գերտերություններ իրենց հարաբերությունները Թուրքիայի հետ կարգավորելու, նրա դեմ ճնշում գործադրելու կամ զիջումների ենթարկելու համար օգտագործում են այն»,- ասաց բանախոսը:

Ռուբեն Մելքոնյանը նշեց, որ այս գործընթացի վրա իր ազդեցությունն ունեցել է արևելյան կաշառատվության մեթոդը:

«Այս որոշմանը հասնելու համար թուրքական պետությունը մեծ ֆինանսական և քաղաքական զոհողությունների է գնացել: Եթե նկատել եք` վերջին ամսվա ընթացքում քանի ֆրանսիական սենատորներ և պատգամավորներ հյուրընկալվեցին Բաքու, Անկարա և ինչպիսի ջերմ ընդունելության արժանացան»,- նշեց բանախոսը:

Ինչ վերաբերում է Ֆրանսիայի նախագահ Նիկոլա Սարկոզիի այն հայտարարությանը, որ Հայոց ցեղասպանության ժխտումը քրեականացնող օրինագիծը նորից կմտցվի օրակարգ, բանախոսը կարծում է, որ տեխնիկական և կազմակերպչական առումով գրեթե անհնար է, որ օրինագիծը ֆրանսիական խորհրդարանում այնպիսի ծավալում ունենա, ինչպիսին նախկինում էր:                                          

«Միգուցե նախագահ Սարկոզին այն դնի շրջանառության մեջ, բայց այն որևէ ընթացք չի կարող ունենալ, քանի որ ֆրանսիական խորհրդարանը շուտով արձակուրդ է գնալու: Սրանով միայն Սարկոզին փորձում է ապացուցել, որ հավատարիմ մնաց իր խոստմանը և մինչև վերջ հայանպաստ դիրքորոշում պահեց»,- ասաց Ռուբեն Մելքոնյանը:

Հիշեցնենք, որ Ֆրանսիայի Սենատը հունվարի 23–ին ձայների 127 կողմ և 86 դեմ հարաբերակցությամբ ընդունել էր «Ցեղասպանությունների ժխտումը քրեականացնելու մասին» օրինագիծը:  Ֆրանսիան Հայոց ցեղասպանությունից բացի ճանաչել է նաև հրեաների ցեղասպանությունը՝ Հոլոքոստը, որի ժխտումն արդեն իսկ քրեականացված է Ֆրանսիայում:

Նոր օրինագծի համաձայն՝ Ֆրանսիայում Հայոց ցեղասպանությունը ժխտողներին 1 տարվա ազատազրկում և 45.000 եվրո տուգանք էր սպառնում։

Օրինագծին դեմ հանդես եկած խորհրդարանականները դրա սահմանադրականությունը վիճարկելու նպատակով հունվարի 31-ին Ֆրանսիայի Սահմանադրական խորհուրդ դիմում էին ներկայացրել:

Ֆրանսիայի Սահմանադրական խորհուրդը կարող էր ընդունել ստորև նշված որոշումներից մեկը`

1. Օրինագիծը համապատասխանում է Սահմանադրությանը. այս դեպքում Սարկոզիի կողմից ստորագրվելուց հետո այն օրենքի ուժ կստանա:

2. Օրինագիծը մասամբ է համապատասխանում Սահմանադրությանը: Այս դեպքում օրինագիծը կվերադարձվի Ազգային ժողով՝ այն «բարեփոխելու» և Սահմանադրությանը համապատասխանեցնելու համար:

3. Օրինագիծն ամբողջությամբ հակասահմանադրական է: Այս դեպքում օրինագիծն օրենքի ուժ չի ստանա, եթե, իհարկե, Ֆրանսիայի նախագահը չպնդի, որպեսզի հարցը դարձյալ Ազգային ժողով մտցվի:                                

Հրաչուհի Ալմաստյան