Շրջանառության մեջ դրված նախագծերի փաթեթը որքան էլ շտկեն, միևնույն է, էությունը հակասահմանադրական է։ Այս մասին խորհրդարանում լրագրողների հետ զրույցում ասաց «Լուսավոր Հայաստան» խմբակցության ղեկավար Էդմոն Մարուքյանը` անդրադառնալով ԱԺ արտահերթ նիստի օրակարգից հետ կանչված նախագծերին:

Հարցին` արդյոք երեկ երեկոյան դեսպանների հետ հանդիպումից հետո է որոշվել հետ կանչել նախագծերը, Մարուքյանն ասաց, որ չի կարող այդ մասին ոչինչ ասել: Միայն կարող է ենթադրել, որ ԱԺ նախագահը հանդիպման ժամանակ ներկայացրել է այն, ինչ փորձում են անել, իսկ դեսպանները նման հանդիպումների ժամանակ սովորաբար լռում են:

«Բայց միջազգային պարտավորությունների համատեքստում բնականաբար զեկուցում են իրենց մայրաքաղաքներ, որտեղից արդեն երկիրը ստանում է այն իմպուլսները, որը կլինի խախտումների պարագայում»,- ասաց նա:

Մարուքյանը հիշեցրեց, որ ԱԺ խորհուրդը վերջին երկու օրերին արդեն մի քանի անգամ հետաձգվել է, սակայն այսօր ևս հրավիրվելու է` ամենայն հավանականությամբ նույն օրակարգով արտահերթ նիստ հրավիրելու համար:

«Պատկերացնում եք` ինչքան կարելի է անլրջացնել նման կարևոր պրոցեսը ու ինչքան կարելի է լինել անորոշ: Իրենք էլ են հասկանում, որ այնքան պրոբլեմատիկ փաթեթ են բերել ու փորձում են շտկել»,- ասաց Մարուքյանը:

Պատգամավորի կարծիքով` քաղաքական մեծամասնությունը փորձում է Սահմանադրության փոփոխությունների նախագիծը տապալել, որպեսզի հանրաքվե անցկացվի մեկ հոդվածի փոփոխության վերաբերյալ:

«Սահմանադրության փոփոխությունների նախագիծը երկրորդ ընթերցում չեն բերել, որ առաջին ընթերցումից հետո տապալեն, ու հարցը գնա հանրաքվեի, բայց որևէ մեկը կարող է ասել, թե ինչու են ժողովրդին տանում ընտրատեղամասեր մի հոդվածի փոփոխության համար, ինչու է պետք մինչև մայիս քարոզարշավ ունենալ, ինչու եք տալիս հնարավորություն Սերժին ու Քոչարյանին դառնալ քարոզիչներ»,- ասաց նա:

Մարուքյանի համոզմամբ` չկա որևէ ճգնաժամ Սահմանադրական դատարանում, և մեկ անձի համար պետք չէ զոհաբերել իրավունքի գերակայությունը, չի կարելի նախկին ռեժիմի ներկայացուցիչներին վերակենդանանալու հնարավորություն տալ: Պատգամավորը խնդրեց մատնացույց անել որևէ ռեֆորմ, որի իրականացմանը ՍԴ-ն խոչընդոտել է:

Հարցին, թե Սահմանադրության այս տեսքով փոփոխությունները կյանքի կոչվելու դեպքում որևէ հետևանք կառաջացնեն նախագծի հեղինակների համար, Մարուքյանն ասաց, որ հետևանքը երկրի համար է լինելու:

«Ինձ համար անձերը էական չեն, մենք պետության համար ենք անհանգստանում»,- ասաց նա:

Մարուքյանը բացառեց, որ շրջանառության մեջ եղած նախագծերին իրենք կողմ քվեարկեն: