Ազգային ժողովի փոխխոսնակ Ալեն Սիմոնյանը որևէ արտառոց դրսևորում չի տեսնում նրանում, որ ԱԺ արտահերթ նիստը չկայացավ, քանի որ նախագծերի փաթեթի հեղինակը օրակարգից հետ է կանչել նախագծերը:

«Հետ կանչման պատճառ կարող է հանդիսանալ՝ սկսած ստորակետից վերջացրած որևէ բառ փոխելը, և նոր խորհրդի նիստը քննարկելու է նոր նախաձեռնություն:

Եթե նիստը չեղարկվել է, նշանակում է այն օրակարգը, որ հաստատել ենք, այլևս գոյություն չունի, և օրակարգ է բերվելու նոր հարց: Հիմա խորհուրդը նիստ կհրավիրի, դրանից հետո բոլորը կիմանան` ինչի մասին է խոսքը»,- ասաց Սիմոնյանը:

ԱԺ փոխխոսնակն անդրադարձավ Սահմանադրության փոփոխությունների նախագծի հեղինակած 37 պատգամավորների ստորագրություններին` վստահեցնելով, որ խմբակցությունը միասնական է, և պետք չէ հաշվել, թե ով է ստորագրել, ով` ոչ:

«Եթե պետք լինի, ութսունութս էլ կստորագրենք։ Մենք բոլորս էլ նույն կարծիքին ենք, որ ճգնաժամը շատ շուտով լուծվելու է: Մենք ունեցել ենք հեղափոխության տարբեր փուլեր, մենք ընտրել ենք տարբեր մարտավարություններ, որոշել ենք փողոց փակել, քաղաքացիներին խորհրդարան ենք հրավիրել, ձեռք ենք մեկնել ՍԴ դատավորներին: Հիմա այս ձևով է որոշում կայացվել դատական առկա ճգնաժամը լուծելու համար, որը մնացել է որպես վերջին բաստիոն հին Հայաստանից»,- ասաց Սիմոնյանը:

Ըստ նրա` կներկայացվի նոր նախագիծ, որի հետևանքները կտեսնեն բոլորը:

Ինչ վերաբերում է այն հարցին, թե արդյոք նախագծերի հետկանչը պայմանավորված է երեկ երեկոյան դեսպանների հետ ԱԺ նախագահի հետ տեղի ունեցած հանդիպումով, Սիմոնյանն արձագանքեց.

«Ես ձեզ վստահեցնում եմ` որևիցե երկրի որևէ դեսպանատան, որևէ միջազգային կառույցի հետ ոչ մի խնդիր չունենք: Եկել են ԱԺ, լավ են արել, բարի գալուստ, քննարկել ենք, գնացել են»:

Տեղեկացնենք, որ արդեն մեկնարկել է ԱԺ խորհրդի արտահերթ նիստը, որտեղ էլ պետք է արտահերթ նիստի օրակարգը հաստատվի: