Ծնողների բողոքից հետո Հայկաշենի մարզային ենթակայության դպրոցին վառելիք կհատկացնի համայնքապետարանը
Այսօր առավոտյան Արմավիրի մարզի Հայկաշեն գյուղի միջնակարգ դպրոցում էին հավաքվել գյուղի աշակերտների ծնողները՝ պահանջելով ապահովել պատշաճ ջեռուցում: Դպրոցը չունի լոկալ ջեռուցում և ձմռան ամիսներին դասասենյակները ջեռուցում են հեղուկ վառելիքով:
Արմավիրի մարզպետի հունվարի 16-ի որոշմամբ լուծվել է դպրոցի տնօրեն Հենրիկ Խրոյանի հետ կնքված աշխատանքային պայմանագիրը: Վերջինս «Հետք»-ի հետ զրույցում ասաց, որ շարունակում է դպրոցում աշխատել, որպես մաթեմատիկայի ուսուցիչ: Ըստ Հ. Խրոյանի՝ ամեն օր դասասենյակներին հատկացվում է 2,6 լիտր հեղուկ վառելիք, ինչը բավարար չէ ամբողջ դասապրոցեսի ժամանակ նորմայի սահմաններում ջերմաստիճան ապահովելու համար: Նրա խոսքով՝ առավոտյան ժամերին կարողանում են ջերմաստիճանն ապահովել, սակայն դասերի կեսից և հատկապես վերջին ժամերին ջերմաստիճանն ընկնում է:
Հայկաշենի դպրոցում սովորում է 103 աշակերտ: Հենրիկ Խրոյանն ասում է, որ դպրոցը ֆինանսավորվում է աշակերտի թվաքանակով, ուստի այդ պայմաններում չեն կարող ջեռուցման ծախսերն ավելացնել և ավելի շատ վառելիք հատկացնել դասասենյակներին:
«Դասարան կա, որ 10 աշակերտ ունի, եթե մի քանիսն էլ հիվանդության պատճառով չգան դպրոց, արդեն թիվն էական է լինում: Ծնողները բողոքում են, որ ցուրտ է, երեխաները դպրոցում հիվանդանում ու այդ պատճառով դասի չեն գալիս»,- նշում է դպրոցի նախկին տնօրենը:
Քանի որ դպրոցը չունի լոկալ ջեռուցում, միջանցքներում ցուրտ է: Երեխաները շատ, թե քիչ տաք դասասենյակներից դուրս գալով միջանցք, մրսում են: Բացի այդ, որքան էլ տաք լինեն դասասենյակները, ամեն անգամ դասասենյակի դուռը բացելիս սառը օդը լցվում է ներս:
Հենրիկ Խրոյանն ասաց, որ քննարկումների արդյունքում հարցը ժամանակավոր լուծում է ստացել: Համայնքապետարանը որոշել է վառելիքի գումար հատկացնել և դրանով հարցը կարգավորել:
Հայկաշեն համայնքի ղեկավար Վարշամ Հովհաննիսյանն էլ ասաց, որ որոշել են 1 տոննա հեղուկ վառելիք հատկացնել դպրոցին: Դրա արդյունքում վառարանները կվառվեն դասերը սկսվելուց մեկ ժամ շուտ, ինչը կկոտրի սառնությունը, ինչպես նաև կկարողանան ջեռուցում ապահովել մինչև դասերի ավարտը:
«Եթե վառելիքը չհերիքի, ընթացքում մի բան կմտածենք: Մարզպետարանի համապատասխան վարչության հետ քննարկել ենք, ուղիներ ենք մտածում եկող տարվա ջեռուցումն ապահովելու համար էլեկտրական մարտկոցներով դասասենյակները ջեռուցել»,- նշում է Վարշամ Հովհաննիսյանը:
Հայկաշենի միջնակարգ դպրոցը մարզային ենթակայության է, սակայն, այլ տարբերակ չունենալով՝ համայնքապետարանն ինքն է որոշել հարցին լուծում տալ:
Արմավիրի մարզում այս պահին լոկալ ջեռուցում չունի 13 դպրոց: Բոլոր դպրոցներն էլ գտնվում են գյուղական համայնքներում: Օրեր առաջ լոկալ ջեռուցման համակարգով ապահովվել է Բաղրամյանի դպրոցը:
Տեղեկացնենք, որ գյուղը գազիֆիկացված չէ, ինչն էլ դժվարություններ է առաջացնում դպրոցի ջեռուցման հարցը լուծելու համար: Սակայն տարիներ շարունակ պատկան մարմինները այլընտրանքային լուծում չեն գտել, և երեխաները դաս են արել ոչ պատշաճ պայմաններում՝ դիզելային վառելիքի հոտը շնչելով:
Հիշեցնենք, որ «Հետք»-ը դեռ տարվա առաջին աշխատանքային օրը՝ հունվարի 8-ին, գրել էր, որ Հայկաշենի դպրոցում ջեռուցման հարցը լուրջ է, և ծնողները երեխաներին դպրոց չեն ուղարկում: Այս մեկ ամսվա ընթացքում մարզպետարանի աշխատակազմը գործուն քայլեր չձեռնարկեց, ինչը հանգեցրեց աշակերտների ծնողների բացահայտ դժգոհությանը:
Մեկնաբանություններ (1)
Մեկնաբանել