«Մենք ի սկզբանե հաղթանակած ենք և այդ մասին  երգով չէ, որ պետք է ապացուցենք: Ես դեմ եմ, որ Հայաստանը մասնակցի Բաքվում կայանալիք Եվրատեսիլին, քանի որ այն հակասում է մեր ազգային արժանապատվությանը, ինքնասիրությանը և սկզբունքներին»,- այս մասին այսօր լրագրողների հետ հանդիպման ժամանակ ասաց երգչուհի Ալլա Լևոնյանը:

Նա նշեց, որ Հայաստանի չմասնակցելը Եվրատեսիլին պետք է ընկալել ոչ թե որպես վախ, այլ արհամարհանք` ուղղված Ադրբեջանին:  «Թող վախենան իրենք, ոչ թե մենք և մտածեն ինչպես անեն, որ շահեն մեր սիրտը», ասաց Ալլա Լևոնյանը:

Նա նշեց նաև, որ  ադրբեջանցիների կողմից երգարվեստի բնագավառում էլ վատ, տհաճ քայլերի են արժանանում  հայ երգիչ-երգչուհիները:   «Նյու-Յորքում`համերգներց մեկի ժամանակ, որին տարբեր ազգերի ներկայացուցիչներ էին մասնակցում, Ադրբեջանի ներկայացուցիչը հրաժարվեց մասնակցել`պատճառաբանելով, որ մեր բեմ բարձրանալուց հետո պետք է բեմը ժավելով մաքրել», ասաց բանախոսը:

Այս տարվա Եվրատեսիլին Հայաստանի մասնակցությանը դեմ է նաև երգիչ Արսեն Գրիգորյանը: «Մենք երբեք չենք հավասարվի ադրբեջանցիներին կամ թուրքերին: Եթե մշակույթը սահմաններ չի ճանաչում, ապա այս անգամ, կարծում եմ` բացառություն  կանենք», ասաց Արսեն Գրիգորյանը:

Նրա կարծիքով, Եվրատեսիլը քաղաքականացված երևույթ է և Հայաստանը`որպես երիտասարդ պետություն պետք է ունենա ճիշտ  մշակութային ռազմավարություն:                           

Հրաչուհի Ալմաստյան