![](/static/articles/01/13/42/l-OmQebVS6hq.jpg)
Կրթաթոշակ և դիպլոմ` կոնսերվատորիայի լավագույն ուսանողին
«Հայաստան» համահայկական հիմնադրամը ս/թ մարտի 1-ին «Հրայր եւ Մարթա Ալբարյանների անվան կրթաթոշակ» եւ դիպլոմ շնորհեց Երեւանի պետական կոնսերվատորիայի «Լավագույն ուսանող 2011» ճանաչված վոկալիստ Արսեն Ստեփանյանին: Ծրագիրը հովանավորում են Հիմնադրամի արգենտինահայ բարերարներ Հրայր եւ Մարթա Ալբարյանները:
Բարերար ամուսինների սահմանած ամենամյա անվանական կրթաթոշակը' 500 ԱՄՆ դոլարին համարժեք ՀՀ դրամ եւ դիպլոմ, Հիմնադրամը շնորհում է 2009 թվականից' առաջադեմ ու շնորհալի ուսանողներին սատարելու նպատակով: Այն 2009 թվականին շնորհվել է ջութակահարուհի Մերի Խոջայանին, 2010-ին' սաքսոֆոնահար Դավիթ Մելքոնյանին, 2011-ին' ջութակահարուհի Աննա Մարգարյանին:
Արսենը Կոնսերվատորիայի վոկալ-տեսական ֆակուլտետի, ակադեմիական երգեցողության բաժնի չորրորդ կուրսի ուսանող է: 2010 թվականին մասնակցել է Դելֆյան խաղերին եւ արժանացել «Ակադեմիական երգ» անվանակարգում 1-ին կարգի մրցանակի «Ոսկե մեդալի», իսկ 2011 թվականին դարձել է 2-րդ հանրապետական մրցույթի դափնեկիր:
«Այս գումարն ինձ կօգնի մասնակցել մարտին Մոսկվայում կայանալիք Մ. Մագամաեւի անվան միջազգային երգի մրցույթին: Մեծ ակնկալիքներով այս տարի մասնակցում եմ նաեւ ՀՀ նախագահի երիտասարդական մրցանակ 2011 մրցույթին»,- իր առաջիկա ծրագրերի մասին ասաց Արսենը: Այս մասին ահյտնում է «Հայաստան» համահայկական հիմնադրամը:
Մեկնաբանել