HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Գլխավոր դատախազությունում քննարկվել են քրեական գործերի կառավարման էլեկտրոնային համակարգի ներդրման խնդիրները

Գլխավոր դատախազության հանրային կապերի բաժինը տեղեկացնում է, որ փետրվարի 18-ին դատախազությունում կայացել է մինչդատական վարույթում գտնվող քրեական գործերի կառավարման էլեկտրոնային համակարգի տեխնիկական առաջադրանքը մշակելու նպատակով վարչապետի 2020թ. հունվարի 30-ի որոշմամբ ստեղծված միջգերատեսչական աշխատանքային խմբի հերթական նիստը, որը վարել է միջգերատեսչական աշխատանքային խմբի ղեկավար, գլխավոր դատախազի տեղակալ Արմեն Հարությունյանը:

Նիստի ընթացքում քննարկվել են «Քրեական գործերի մինչդատական վարույթի էլեկտրոնային կառավարման համակարգի» տեխնիկական առաջադրանքի և տեխնիկական մասնագրերի մշակման աշխատանքների կազմակերպական հարցերը, այդ փաստաթղթերի մշակման ժամանակացույցը։ Քննարկվել են համակարգի աշխատանքի տրամաբանության և ալգորիթմների հետ կապված մի շարք հիմնախնդիրներ՝ կապված դրա նպատակների, օգտատերերի և շահառուների շրջանակների, համակարգի հիմնական գործիքակազմի, ավտոմատացվող հիմնական գործընթացների, ինչպես նաև արդեն իսկ գործող այլ էլեկտրոնային համակարգերի հետ փոխգործելիության մեխանիզմների և հնարավորությունների հետ:   

Նիստի ընթացքում ներկայացվել է համակարգի գործարկման համար հիմնարար նշանակություն ունեցող քրեական դատավարության նոր օրենսգրքի նախագծի մշակման գործընթացը, ինչպես նաև անդրադարձ է կատարվել էլեկտրոնային նման համակարգերի գործարկման  միջազգային փորձառությանը: Գլխավոր դատախազի տեղակալն ընդհանուր գծերով ներկայացրել է ծրագրի իրականացման ուղղությամբ մինչ այժմ կատարված աշխատանքները։

Նիստին մասնակցել են Հայաստանի դատախազության, փոխվարչապետի գրասենյակի, արդարադատության նախարարության, ազգային անվտանգության ծառայության, ոստիկանության, հատուկ քննչական ծառայության, դատական դեպարտամենտի, քննչական կոմիտեի, պետական եկամուտների կոմիտեի, ինչպես նաև պետական կառավարման համակարգի բարեփոխումների հանձնաժողովի ներկայացուցիչները։

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter