Եվրոպական միության 2019թ. բյուջեով Հայաստանի Հանրապետությանը կտրամադրվի 65 մլն եվրո արժողությամբ աջակցություն, որից 2019 թվականի տարեկան գործողությունների ծրագրով մշակվել է երեք ֆինանսավորման համաձայնագրեր՝ ընդհանուր 46 մլն եվրո արժողությամբ, հավելյալ 17 մլն եվրո կտրամադրվի «Հարևանության ներդրումային պլատֆորմ» գործիքի շրջանակում և 2 մլն եվրո՝ Արևելյան գործընկերության հարթակին՝ քաղաքացիական հասարակության ծրագրերի համար:

Կառավարության նիստի օրակարգում ներառված 46 մլն եվրո արժողությամբ երեք ֆինանսավորման համաձայնագրերն են «ԵՄ-ն էներգաարդյունավետության և շրջակա միջավայրի համար»: Ըստ դրա՝  ԵՄ կողմից Հայաստանի Հանրապետությանը տրամադրվող 2017-2020թթ. միասնական աջակցության շրջանակի ներքո՝ 2019 թվականի տարեկան գործողությունների ծրագրի շրջանակներում, ՀՀ-ի և ԵՄ-ի միջև նախատեսվում է ստորագրել «ԵՄ-ն էներգաարդյունավետության և շրջակա միջավայրի համար» ֆինանսավորման համաձայնագիր՝ 9 մլն եվրո ընդհանուր արժողությամբ: Իսկ վերը նշված 17 մլն եվրոն կօգտագործվի որպես էներգաարդյունավետության վարկային ծրագրի դրամաշնորհային բաղադրիչ։

Կառավարության այսօրվա նիստի ընթացքում փոխվարչապետ Մհեր Գրիգորյանը նշեց, որ ծրագրի հիմնական նպատակն է աջակցել Հայաստանում էներգաարդյունավետությանն ու շրջակա միջավայրի պահպանությանն ուղղված նախաձեռնություններին: Ծրագրի շրջանակներում նախատեսվում է բարձրացնել գոյություն ունեցող շենքերում, մասնավորապես՝ բազմաբնակարան բնակելի շենքերում, ինչպես նաև հանրային շենքերում, չգազիֆիկացված համայնքներում և ցածր եկամուտ ունեցող տնային տնտեսություններում էներգաարդյունավետության մակարդակը, ինչպես նաև նվազեցնել ջրի աղտոտումը Սևանա լճում։

Երկրորդ՝ «Տեղական դերակատարների հզորացում զարգացման նպատակով» համաձայնագրով նախատեսվում է Հայաստանին տրամադրել 14 մլն եվրո աջակցություն։

Ծրագրով կնախատեսվեն նորարարական մեթոդներ և գործիքներ՝ համայնքի ներկայացուցիչներին առաջնահերթությունների նախանշմանը և տեղական ռազմավարությունների մշակմանն առնչվող քննարկումներին ներգրավելու համար: Միաժամանակ կձևավորվեն գործողությունների իրականացման տեղական խմբեր, կխթանվի տարբեր շահագրգիռ կողմերի (հանրային, մասնավոր, քաղաքացիական հասարակության), ինչպես նաև սոցիալական տարբեր խմբերի ներկայացուցիչների միջև համագործակցությունը: Ծրագրի շրջանակներում նախատեսվում է նաև համայնքների ռազմավարությունների իրագործման գործընթացում առաջնային դերը և նախաձեռնությունը վերապահել համայնքի անդամներին։

Երրորդ համաձայնագիրը  «Հայաստանի Հանրապետության կառավարության և Եվրոպական հանձնաժողովի միջև «Համապարփակ և ընդլայնված գործընկերային համաձայնագիր  բարեփոխումների գործիք» ֆինանսավորման համաձայնագրի» ստորագրմանն է վերաբերում։ Ըստ համաձայնագրի՝ ԵՄ կողմից Հայաստանի Հանրապետությանը տրամադրվող 2017-2020թթ. միասնական աջակցության շրջանակի ներքո՝ 2019 թվականի տարեկան գործողությունների ծրագրի շրջանակներում, ՀՀ-ի և ԵՄ-ի միջև նախատեսվում է ստորագրել «ՀԸԳՀ բարեփոխումների գործիք» ֆինանսավորման համաձայնագիր՝ 23 մլն եվրո ընդհանուր արժողությամբ:

Լուսանկարը՝ արխիվային