Ջրառատ-Հովտաշատ-Երևան միջմարզային N487 միկրոավտոբուսները, որոնք սպասարկում են Ջրառատ, Հայկաշեն, Գայ, Հովտաշատ  գյուղերը, շարունակում են ոչ պատշաճ ձևով երթուղի դուրս գալ: Միկրոավտոբուսները մասամբ սպասարկում են նաև Հայանիստ, Խաչփար, Ազատաշեն, Գեղանիստ գյուղերը:

Դեռևս 2016 թվականի ապրիլի 29-ին ՀՀ տրանստպորտի և կապի աշխատակազմի  ղեկավար Գ. Գրիգորյանը ստորագրել էր N487 միջմարզային միկրոավտոբուսային երթուղու չվացուցակը, ըստ որի այդ երթուղով երթևեկող տրանսպորտային միջոցների քանակը եղել է 12 (օրվա ընթացքում երթերի քանակը՝ 60, շրջապտույտների քանակը՝ 30): Հրամանից հասկանալի է նաև, որ տրանսպորտային միջոցները երթուղի պետք է դուրս գային 20 րոպե տարբերությամբ:

Նշենք, որ 2016 թվականին N487 միկրոավտոբուսները սպասարկում էին նաև Գետաշեն գյուղը, սակայն Գետաշեն և Հայանիստ գյուղի բնակիչները բողոքեցին միկրոավտոբուսների աշխատանքից, և 35 համարի ավտոբոսները սկսեցին սպասարկել այդ գյուղերը:

Այնուհետև, 2017 թվականին տրանսպորտի, կապի և տեղեկատվական տեխնոլոգիաների նախարար Վ. Մարտիրոսյանի հրամանով 2016 թվականին ստորագրված հրամանը ուժը կորցրած է ճանաչվում, և 2017 թվականի օգոստոսի 25-ին Վ. Մարտիրոսյանը ստորագրում է նոր հրաման, ըստ որի` սահմանվում է գ. Ջրառատ-գ. Հովտաշատ-Երևան երթուղու նոր չվացուցակ և ուղեգիծ: Նոր հրամանում տրանսպորտային միջոցների քանակը եղել է 8 (օրվա ընթացքում կատարվող երթերի քանակը՝ 32, շրջապտույտների քանակը` 16):

Սակայն ինչպես 2016 և 2017 թվականներին, այնպես էլ հիմա երթուղում չկա ո՛չ 8 և ո՛չ էլ 12 տրանսպորտային միջոց, եղածների մի մասն էլ գտնվում է ոչ երթեւեկելի վիճակում. ձմռանը միկրոավտոբուսների մի մասը պատշաճ ձևով չի տաքացվում, հաճախ ճանապարհին մեքենաները խափանվում են, և մարդիկ ստիպված են լինում ուրիշ միջոցներով հասնել Երևան (եղել է դեպք, երբ միկրոավտոբուսի դուռը փակվել է, և ուղևորները ստիպված են եղել դուրս գալ հետևի դռնով): Ուղևորները նշում են, որ անգամ կանգնել հնարավոր չէ, քանի որ Արմավիրի մարզի Գայ գյուղի շուկայից, ինչպես նաև Մալաթիայից մարդիկ տոպրակներով են բարձրանում:

Պատահում է, որ վարորդները խցանումների պատճառով չեն հասնում Կիլիկիա ավտոկայան և ուղևորներին իջեցնում են կա՛մ Մալաթիա-Սեբաստիա վարչական շրջանում, կա՛մ էլ Գարեգին Նժդեհի հրապարակի մոտ: Բայց ամենամեծ խնդիրը շարունակում է մնալ այն, որ միկրոավտոբուսները երթուղի են դուրս գալիս 50-60 րոպե տարբերությամբ, մինչդեռ 2016 և 2017 թվականներին ստորագրված հրամանում նշված էր, որ տրանսպորտային միջոցները երթուղի պետք է դուրս գան 20 րոպե տարբերությամբ: Այս իրավիճակի պատճառով հինգ գյուղերի բնակիչներ, այդ թվում՝ ուսանողներ, հաճախ ուշանում են դասերից և աշխատանքից:

Լիանա Ինջիղուլյան

Երևանի Վ․Բրյուսովի անվան պետական լեզվահասարակագիտական համալսարանի ուսանող