Երեկ հայտնի դարձավ, որ Վրաստանում նոր կորոնավիրուսով վարակման մեկ դեպք է արձանագրվել: Վարակված 50-ամյա տղամարդը վերջին շաբաթվա ընթացքում ճամփորդում էր Իրանում և Վրաստան էր վերադարձել Ադրբեջանի տարածքով:

Վրաստանի առողջապահության նախարար Եկատերինա Տիկարաձեն հայտնել էր, որ կորոնավիրուսով վարակման դեպքից հետո կառավարության որոշմամբ 2 շաբաթով փակվել է Ադրբեջանի հետ սահմանը:

Հայաստանի առողջապահության նախարար Արսեն Թորոսյանն այսօր առավոտյան իր ֆեյսբուքյան էջում արված գրառմամբ տեղեկացրեց, որ խոսել է Վրաստանի առողջապահության նախարար Եկատերինե Տիկարաձեի հետ՝ հասկանալու կորոնավիրուսով պայմանավորված իրավիճակը մեր հարևան երկրում:

«Նախարարի հավաստմամբ` կորոնավիրուսով ախտորոշված պացիենտի հետ շփված 4 անձինք հետազոտվել են և նրանց մոտ չի հայտնաբերվել վարակը: Նրանք 14 օր կմնան մեկուսացման մեջ»,- նշել է Արսեն Թորոսյանը: