Հողի հարկի զիջում՝ աշխատավարձի պարտքի դիմաց. Արմավիրի մարզի համայնքների աշխատավարձերի ոդիսականը
Արմավիրի մարզի Արգինայի համայնքապետարանի աշխատակիցները, այդ թվում համայնքապետ Ռոստամ Արոյանը, 2019թ.-ին մի քանի ամիս աշխատավարձ չեն ստացել: Համայնքապետարանը չի կարողացել ժամանակին աշխատավարձ վճարել, քանի որ գյուղի խոշոր հարկատուները հարկերը ժամանակին չեն վճարել: Դեկտեմբերի 31-ի դրությամբ Արգինա համայնքն աշխատավարձի գծով պարտք է 1 մլն 932 հազար դրամ:
Ռ. Արոյանն ասաց, որ օրինակ, նախկին պատգամավոր Խաչիկ Մանուկյանը իրենց համայնքում հողեր ունի, թեև դրանք այլ մարդու անունով է ձևակերպված, սակայն չեն կարողանում ժամանակին հարկերը հավաքագրել: Նախորդ տարի, անձը, ում անունով ձևակերպված են եղել հողերը, մահացել է, և հիմա փաստի առաջ են կանգնել, չեն կարողանում հողի հարկը հավաքագրել:
«Կան ֆիզիկական անձինք, որոնք մահացել են կամ Ռուսաստանում են, ունեն 4-5 հարյուր հազարով պարտքեր: Դրսից մարդիկ կան, ոչ հասցե ունենք, ոչ էլ կարողանում ենք կապ հաստատել, որ հարկերը պահանջենք»,-ասում է Ռ. Արոյանը:
Համայնքապետն այսօր էլ հանձնարարել է աշխատակիցներին, որպեսզի ծանուցագրեր բաժանեն համայնքի բնակիչներին՝ հարկերը ժամանակին վճարելու զգուշացումներով:
Դեկտեմբերի 31-ի դրությամբ Արգինա համայնքում միայն 500 հազար դրամ և ավելի պարտք ունեցողները երեքն են, որոնց ընդհանուր պարտավորության չափը համայնքապետարանին կազմում է 3 մլն 207 հազար դրամ:
Արգինա համայնքը վերջին 4-5 տարիների ընթացքում պարբերաբար տուժել է բնական աղետից՝ կարկուտից, ինչի հետևանքով դժվարությամբ են կարողանում հարկերը հավաքել: Կառավարության կողմից տրամադրվող դոտացիան, համայնքապետի ասելով, կազմում է բյուջեի 27%-ը: Համայնքն իր կարիքները հոգում է հիմնականում հարկերի ու տուրքերի հավաքագրման հաշվին, ինչը երբեմն չի բավարարում:
«2016թ.-ին ընտրվել եմ համայնքապետ՝ 4 մլն դրամ պարտքով: 2017թ.-ին մանկապարտեզը չի գործել և մինչև տարեվերջ ամբողջ պարտքը մարել ենք: 2018-2019թթ. մանկապարտեզն աշխատել է, դա էլ է ծախս: Եթե խոշոր հարկատուները ժամանակին վճարեին, կկարողանայինք պարտքերը վճարել: Ասացին` մինչև դեկտեմբերի վերջ կվճարենք հարկերը, բայց չվճարեցին»,-«Հետք»-ի հետ զրույցում ասաց Արգինայի համայնքապետ Ռոստամ Արոյանը:
Ըստ համայնքապետի՝ վերջերս էլ պատահմամբ իմացել են, որ մանկապարտեզի աշխատակիցների 2016թ. աշխատավարձի գծով պարտք ունեն: Ընդունման-հանձնման ժամանակ պարտքը չի արձանագրվել և վերջերս ԴԱՀԿ ծառայությունից գրություն են ստացել ու այսօր արդեն վճարել են 150,000 դրամ պարտքը:
Միայն Արգինան չէ, որ ունի աշխատավարձերի պարտքեր: Արմավիրի մարզի 9 համայնք դեկտեմբերի 31-ի դրությամբ ունեցել է ընդհանուրը 6 մլն 435 հազար դրամ աշխատավարձի պարտք: Դրանց մի մասը նախորդ տարիներից «ժառանգած» պարտքն է:
Խառն է վիճակը Ջրաշեն համայնքում: Այստեղ էլ որպես աշխատավարձի պարտք նշված է 1 մլն 999 հազար դրամ:
Ջրաշենի համայնքապետ Լևոն Վարդանյանն ասաց, որ այս պահին ճշգրտումներ են արվում, որպեսզի հասկանան, թե ինչպես կարգի բերեն թղթաբանությունը:
«Դրանք հին պարտքեր են, որոնք վճարվել է: Հիմնականում վճարվել է հողի հարկի տեսքում: Պահում է արվել: Ասել են՝ դուք պարտք եք հողի հարկ, մենք էլ պարտք ենք աշխատավարձ: Հողի հարկերը վճարվել է, բայց համայնքապետարանի վրայից աշխատավարձի պահը հաշվապահությունով չի հանվել: Ստացվում է, որ գործարքն արվել է, բայց ձևակերպումը չի արվել»,-ասում է Լ. Վարդանյանը:
Ջրաշենի համայնքապետի ասելով՝ այդ «գործարքը» տեղի է ունեցել 2012թ.-ին: Քանի որ վճարման հնարավորություն համայնքապետարանը չի ունեցել, ստիպված հողի հարկով են պարտքը զրոյացրել:
«Հիմա այդ ձևակերպման հարցերով ենք զբաղվում, երկար գործընթաց է, բայց աշխատանքներ ենք տանում այդ ուղղությամբ»,-հավելեց Ջրաշենի համայնքապետը:
Մեկնաբանել