Ազգային ժողովի նախկին պատգամավոր Ալեքսան Պետրոսյանը չի ընդունում բնապահպանության նախկին նախարար Արամ Հարությունյանին փողերի լվացման հարցում օժանդակելու վերաբերյալ մեղադրանքը։ Նա պնդում է, որ Արամ Հարությունյանից փոխառության ձևով գումար է վերցրել, որը հետագայում վերադարձրել է։

Երևան քաղաքի ընդհանուր իրավասության դատարանում, նախագահությամբ դատավոր Վարդան Արմենակի Գրիգորյանի, այսօր մեկնարկեց Ազգային ժողովի նախկին պատգամավոր Ալեքսան Պետրոսյանի գործով դատական նիստը: Վերջինս առավել հայտնի է «ՄԱՊ-ի Ալիկ»  անունով:

Նիստի մեկնարկին Ալեքսան Պետրոսյանի պաշտպաններից Գոռ Միքայելյանը բացարկի միջնորդություն ներկայացրեց դատախազ Հայկ Պետրոսյանին։ Պաշտպանը նշեց, որ Ալեքսան Պետրոսյանի գործը չպետք է Հատուկ քննչական ծառայությունում քննվեր, հետևաբար Հայկ Պետրոսյանը, ով դատախազության` ՀՔԾ-ում քննվող գործերի մինչդատական վարույթի օրինականության նկատմամբ հսկողության վարչության դատախազ է, չի կարող պաշտպանել մեղադրանքը։

Նշենք, որ  քրեական դատավարության օրենսգիրքը սահմանում է,  թե որ հոդվածով հարուցված քրեական գործը որ քննչական մարմինը պետք է քննի, սակայն օրենքը նաև գլխավոր դատախազին լիազորություն է տալիս որոշելու որևէ գործի քննչական ենթակայությունն ու այն որևէ քննչական մարմնի վարույթից վերցնելն և փոխանցելը Հատուկ քննչական ծառայության վարույթ։

Մեկնաբանելով Քրեական դատավարության օրենսգրքի 190-րդ հոդվածը, որով սահմանվում է գործերի քննչական ենթակայությունը` Գոռ Միքայելյանը նշեց, որ, փաստորեն, գլխավոր դատախազն իրավունք ունի վերցնել ու ՀՔԾ վարույթ փոխանցել միայն այն գործերը, որոնք մեկ այլ քննչական մարմնում են հարուցել։ Մինչդեռ այս դեպքում, ըստ Միքայելյանի, Ալեքսան Պետրոսյանի գործը հարուցվել և շարունակել է քննվել ՀՔԾ-ում, այլ ոչ թե որևէ այլ մարմնից փոխանցվել ՀՔԾ-ին։

Շարունակելով՝ Պետրոսյանի մյուս պաշտպան Միհրան Պողոսյանը նշեց, որ ըստ Քրեական դատավարության օրենսգրքի՝ Ալեքսան Պետրոսյանին վերագրվող հոդվածով գործերը քննվում են  Ազգային անվտանգության ծառայությունում։ Ըստ Պողոսյանի՝  եթե քրեական գործը ԱԱԾ-ում քննվեր, ինչպես որ օրենքն է նախատեսում,  դրա նկատմամբ չէր կարող դատախազական հսկողություն իրականացնել Հայկ Պետրոսյանը։ Կասկածի տակ չդնելով դատաախազ Պետրոսյանի պրոֆեսիոնալիզմը՝ պաշտպանն, այնուամենայիվ, պնդեց, որ նա Ալեքսան Պետրոսյանի գործով պատշաճ դատախազ չէ։

Հայկ Պետրոսյանն առարկեց միջնորդության դեմ։ Նա հարց բարձրացրեց՝ եթե  գործը ՀՔԾ-ում է քննվել, ինչպե՞ս կարող է դատարանում մեղադրանքը պաշտպանել ոչ թե ՀՔԾ-ում, այլ ԱԱԾ-ում քննվող գործերի մինչդատական վարույթի օրինականության նկատմամբ հսկողության վարչության որևէ դատախազ։ Վերադառնալով խորհրդակցական սենյակից՝ դատավոր Վարդան Գրիգորյանը մերժեց պաշտպանների ներկայացրած բացարկի միջնորդությունը։

Հետո դատախազն ընթերցեց Ալեքսան Պետրոսյանի վերաբերյալ ծավալուն մեղադրանքը՝ սկսելով Արամ Հարությունյանի կողմից ենթադրյալ կաշառք ստանալու, փողերի լվացման դրվագներից։

Այսպես՝ ըստ մեղադրանքի՝ Ալեքսան Պետրոսյանը, հանդիսանալով ձեռնարկատիրական գործունեություն իրականացնող «ՄԱՊ» ՓԲ ընկերության սեփականատեր, իսկ 2003-2007թթ. ընթացքում զբաղեցնելով Ազգային ժողովի պատգամավորի պաշտոնը, մտերիմ հարաբերություններ է ունեցել ՀՀ օրենսդիր և գործադիր իշխանության մարմիններում տարբեր ղեկավար պաշտոններ զբաղեցրած Արամ Հարությունյանի հետ:

2007թ. հունիսի 8-ին Արամ Հարությունյանը նշանակվել է Բնապահպանության նախարար և կառավարության որոշման համաձայն՝ ի պաշտոնե հանդիսացել նաև ռազմավարական նշանակություն ունեցող օգտակար հանածոներ պարունակող ընդերքի տեղամասերի նկատմամբ հանքային իրավունքի ձևավորման միջգերատեսչական մրցութային հանձնաժողովի նախագահ:

 2007թ. ընթացքում Ալեքսան Պետրոսյանի որդին՝ «ՄԱՊ»  ՓԲ ընկերության գլխավոր տնօրեն Մակար Պետրոսյանը, հանքարդյունաբերությամբ զբաղվելու մտադրություն է ունեցել և, հանդիսանալով նաև «Լուլիար» ՍՊ ընկերության սեփականատեր և տնօրեն, լիազորված անձի միջոցով 2007թ. հոկտեմբերի 5-ին մասնակցել է Արամ Հարությունյանի ղեկավարած ռազմավարական նշանակություն ունեցող օգտակար հանածոներ պարունակող ընդերքի տեղամասերի նկատմամբ հանքային իրավունքի ձևավորման միջգերատեսչական մրցութային հանձնաժողովի կողմից կազմակերպված ռազմավարական նշանակություն ունեցող օգտակար հանածոներ պարունակող ընդերքի տեղամասերի նկատմամբ հանքային իրավունքի ձևավորման առաջնահերթություն ստանալու աճուրդին, որտեղ հաղթող  է ճանաչվել «Լուլիար» ՍՊ ընկերությունը, որին տրվել է ընդերքն օգտակար հանածոների շահագործման նպատակով ուսումնասիրության «թիվ 55» հատուկ լիցենզիան`  Տավուշի մարզի Սառնաղբյուրի պղնձի երևակումում երկրաբանահետախուզական աշխատանքներ կատարելու համար:

2007թ. աշնանը Արամ Հարությունյանը «Հանրապետական երկրաբանական ֆոնդ» ՊՈԱԿ-ի տնօրենի տեղակալ, իր մտերիմ Սուրեն Միքայելի Ավագյանից տեղեկացել է, որ գործարար Սիլվա Համբարձումյանն ունի ՀՀ-ում հանքարդյունաբերությամբ զբաղվելու մտադրություն և հետաքրքրություն է դրսևորել օգտակար հանածոների արդյունահանման նպատակով երկրաբանական ուսումնասիրության լիցենզիաներ ձեռք բերելու հարցում:

Արամ Հարությունյանը, քննարկումների ժամանակ Սիլվա Համբարձումյանից տեղեկանալով, որ նա հետաքրքրություն է դրսևորել ՀՀ տարբեր բնակավայրերում գտնվող երեք հանքերևակումների, այդ թվում՝ Տավուշի մարզի Սառնաղբյուրի պղնձի հանքերևակման նկատմամբ, նրան հայտնել է, որ Տավուշի մարզի Սառնաղբյուրի ուսումնասիրության հատուկ լիցենզիան արդեն իսկ ձեռք է բերել իր հետ մտերիմ հարաբերությունների մեջ գտնվող,  «ՄԱՊ»  ընկերության սեփականատեր Ալեքսան Պետրոսյանը, սակայն նա ունի հնարավորություն գումարի դիմաց կազմակերպել նշված, ինչպես նաև մյուս երկու լիցենզիաները Սիլվա Համբարձումյանին տրամադրելու գործընթացը: Սիլվա Համբարձումյանը համաձայնել է, որից հետո Արամ Հարությունյանը, նյութական շահագրգռվածությունից ելնելով, Սիլվա Համբարձումյանի հետ ունեցած պայմանավորվածության համաձայն՝ կազմակերպել է «Լուլիար»  ՍՊ ընկերությունը լիցենզիայով հանդերձ Սիլվա Համբարձումյանին փոխանցելու գործընթացը:

Այնուհետև, հերթական հանդիպումների ժամանակ Արամ Հարությունյանը, Սիլվա Համբարձումյանից հավաստիանալով, որ նա պատրաստակամ է առանձնապես խոշոր չափերի կաշառք տալ թվով 10 ուսումնասիրության հատուկ լիցենզիաներ ձեռք բերելու համար, տվել է իր համաձայնությունը նրա օգտին իր լիազորությունների շրջանակներում  գործողություններ կատարելու հարցում և առաջարկել ուսումնասիրել երկրաբանական ֆոնդի տվյալներն ու ներկայացնել առաջարկություն հետաքրքրող կոնկրետ հանքերևակումների վերաբերյալ:

Արդյունքում, 2008թ. հունվար-նոյեմբեր ամիսների ընթացքում Սյունիքի, Լոռու և Գեղարքունիքի մարզերի տարբեր բնակավայրերում գտնվող վերոհիշյալ հանքերևակումների ուսումնասիրության թվով 10 հատուկ լիցենզիաներն անցել են Սիլվա Համբարձումյանին պատկանող ընկերությունների տրամադրության տակ: Ձեռք բերված պայմանավորվածության համաձայն՝ 2008թ. հունվար ամսից մինչև նույն տարվա նոյեմբեր ամիսն ընկած ժամանակահատվածում, ուսումնասիրության հատուկ լիցենզիաները Սիլվա Համբարձումյանին փոխանցելու գործընթացին զուգահեռ՝ վերջինս «ՎՏԲ-Հայաստան»  բանկի գլխամասի իր  տնօրինության տակ գտնվող հաշվեհամարներից կանխիկացրել և Սուրեն Ավագյանի միջոցով Արամ Հարությունյանին է տվել 6 մլն ԱՄՆ դոլար կաշառքի գումարը:

Պահանջված կաշառքի գումարի մյուս մասը՝ 8 մլն ԱՄն դոլարը Արամ Հարությունյանը Սիլվա Համբարձումյանից 2008-2011թթ. ընթացքում ստացել է բանկային փոխանցումների եղանակով ու այդ հարցում պաշտոնատար անձին օժանդակել են նրա մտերիմներ Արմեն Խաչատրյանը, Գագիկ Կարապետյանը, Վիկտոր Մարտիրոսյանը և վերջին երկուսի ու Արամ Հարությունյանի հետ մտերիմ հարաբերությունների մեջ գտնվող, 1990-ական թվականներից Արաբական Միացյալ էմիրություններում մշտական բնակություն հաստատած, անշարժ գույքի առքուվաճառքով զբաղվող, ՀՀ քաղաքացի Արաքս Դիլանյանը:

Ըստ մեղադրանքի՝ Արամ Հարությունյանն Ալեքսան Պետրոսյանին առաջարկել է օժանդակել իրեն

 2011թ. սկզբներին Ալեքսան Պետրոսյանը Բնապահպանության նախարարի պաշտոնը զբաղեցնող Արամ Հարությունյանից տեղեկացել է, որ նրա պաշտոնավարման ընթացքում թույլ տված վերոհիշյալ հանցավոր գործունեության արդյունքում ստացված գումարից ավելի քան 5 մլն ԱՄՆ դոլարը մուտքագրվել է Արաբական Միացյալ Էմիրություններում գտնվող, նրա կողմից տնօրինվող բանկային հաշվեհամարներին և նպատակադրվել է հանցավոր ճանապարհով ստացված գումարի ծագման իրական աղբյուրը քողարկելու, դրանց օրինական տեսք տալու նպատակով գումարները փոխանցել ՀՀ տարածք, այդ կերպ դրանք տնօրինելու հնարավորություն ստանալ, որպիսի գործողությունները կատարելուն օժանդակելու առաջարկություն է ներկայացրել Ալեքսան Պետրոսյանին:

Ալեքսան Պետրոսյանն, ըստ մեղադրանքի, հանցավոր ճանապարհով ստացված գույքն օրինականացնելուն օժանդակելու դիտավորությամբ, առաջարկն ընդունել է և պատրաստակամություն հայտնել կազմակերպել իրեն պատկանող, Բրիտանական Վիրջինյան Կղզիներում գրանցված՝ «Տառասկո Ինվեսթմենթ» ՍՊ ընկերության և Հայաստանում գործունեություն իրականացնող «ՄԱՊ» ՓԲ ընկերության միջոցով գումարները Հայաստանի Հանրապետություն փոխանցելու, դրանք կանխիկացնելու և պաշտոնատար անձին տրամադրելու գործընթացը:

Այնուհետև ձեռք բերված պայմանավորվածության համաձայն՝ Ալեքսան Պետրոսյանը Արամ Հարությունյանին է տրամադրել «Տառասկո Ինվեսթմենթ» ՍՊ ընկերության՝ Շվեյցարիայի Համադաշնության Ցյուրիխ քաղաքում գտնվող բանկերից մեկում իր հաշվեհամարը, որից հետո Արամ Հարությունյանը կազմակերպել է Սիլվա Համբարձումյանից ստացած առանձնապես խոշոր չափերով կաշառքի գումարի՝ 5.049.005 ԱՄՆ դոլարի փոխանցումն այդ հաշվեհամարին:

Ըստ մեղադրանքի՝ Արամ Հարությունյանի պահանջով նրա մտերիմ Վիկտոր Մարտիրոսյանը 2011թ. մարտի 24-ին Արաբական Միացյալ Էմիրությունների Աբու Դաբիի բանկերից մեկի իր հաշվեհամարից 2.001.005 ԱՄՆ դոլար, իսկ 2011թ. մարտի 29-ին Արամ Հարությունյանն անձամբ Աբու Դաբի քաղաքի նույն բանկի իր հաշվեհամարից 3.047.975 ԱՄՆ դոլար գումարները փոխանցել է «Տառասկո Ինվեսթմենթ»  ՍՊ ընկերության վերը նշված հաշվեհամարին: Այնուհետև Ալեքսան Պետրոսյանն իրեն պատկանող կազմակերպության հաշվեհամարին ստացված գումարներից 1.901.000 ԱՄՆ դոլարը՝ 2011թ. մարտի 28-ին, իսկ 3.048.000 ԱՄՆ դոլարը՝ մարտի 29-ին փոխանցել է Շվեյցարիայի Համադաշնությունում գտնվող բանկի իր անձնական հաշվեհամարին, ապա տարբեր ժամանակահատվածներում  դրանք կրկին մուտքագրել «Տառասկո Ինվեսթմենթ» ՍՊ ընկերության ինչպես վերոհիշյալ, այնպես էլ այլ բանկերում եղած տարբեր հաշվեհամարների:

Դրանից հետո «Տառասկո Ինվսեթմենթ» ՍՊ ընկերության և «ՄԱՊ» ՓԲ ընկերության միջև 2009թ. հունվարի 5-ին կնքված անտոկոս փոխառության պայմանագրի ուժով 2011թ. մարտի 29-ից մինչև 2014թ. օգոստոսի 25-ն ընկած ժամանակահատվածում Ալեքսան Պետրոսյանը նշված գումարից 2.792.730 ԱՄՆ դոլարը փոխանցել է «ՄԱՊ» ՓԲ ընկերության Հայաստանյան բանկերում եղած հաշվեհամարներին, իսկ մնացած մասը տնօրինել «Տառասկո Ինվեսթմենթ» ՍՊ ընկերության միջոցով, օգտագործել բիզնես գործունեության նպատակով:

«Տառասկո Ինվեսթմենթ»  ՍՊ ընկերության բանկային հաշվեհամարներից «ՄԱՊ»  ՓԲ ընկերության հաշվին գումարներ փոխանցելուն զուգահեռ Ալեքսան Պետրոսյանը ինչպես հիշյալ գումարներից, այնպես էլ իր անձական միջոցներից, 2011թ. ապրիլ ամսից մինչև 2016թ. դեկտեմբեր ամիսն ընկած ժամանակահատվածում Արամ Հարությունյանին մաս-մաս տվել է նրա կողմից «Տառասկո Ինվեսթմենթ» ՍՊ ընկերության հաշվեհամարին փոխանցված ընդհանուր  1.861.586.143 ՀՀ դրամին համարժեք 5.049.005 ԱՄՆ դոլար գումարը:

Այսինքն՝ ըստ մեղադրանքի՝  Ալեքսան Պետրոսյանը վերը նշված գործողություններով օժանդակել է պաշտոնատար անձ Արամ Հարությունյանի կողմից հանցավոր ճանապարհով ձեռք բերած՝ առանձնապես խոշոր չափերով՝ 14 մլն ԱՄՆ դոլար կաշառքի մաս կազմող՝ 5.049.005 ԱՄՆ դոլար գումարն օրինականացնելուն:

Ալեքսան Պետրոսյանը չընդունեց իրեն առաջադրված մեղադրանքը

 Մեղադրանքի վերաբերյալ դիրքորոշում հայտնելիս ԱԺ նախկին պատգամավորը հայտնեց, որ ինքն ընդհանրապետ ոչինչ չի արել, որ  իրավական առումով իր համար պարզ է, թե ինչ հոդվածով են իրեն մեղադրանք առաջադրել, սակայն մեղադրանքի էությունը պարզ չէ։

«Ինձ համար պարզ չէ, թե ես ե՞րբ սկսեցի օժանդակել Արամ Հարությունյանին, ե՞րբ ավարտվեց օժանդակելը, ինչո՞վ օժանդակեցի, ի՞նչ գործողություններով օժանդակեցի, կամ Արամ Հարությունյանն ինչպե՞ս լվաց իր փողերը, որտե՞ղ լվաց,  ի՞նչ գործողություն արեց, որտեղի՞ց ես պիտի իմանայի այս ամենի մասին ու նրան օժանդակեի։ Ես չգիտեմ, թե որ փուլում եմ Արամին օժանդակել կամ ես որտեղից պիտի իմանայի դրանք  ինչ փող են, եթե ես փողը ստացել եմ բանկի  փոխանցումով»,- ասաց Ալեքսան Պետրոսյանը։

Նշենք, որ այսօրվա նիստի ընթացքում, նախքան մեղադրանքին անդրադառնալը, Պետրոսյանի պաշտպան Միհրան Պողոսյանը ցանկանում էր միջնորդություն ներկայացնել գործում որոշ ապացույցներ անթույլատրելի ճանաչելու վերաբերյալ, սակայն դատարանը թույլ չտվեց ավարտել միջնորդությունը՝ նշելով, թե դա վաղաժամ է ներկայացվում, դեռևս գործում առկա որևէ ապացույց չի հետազոտվել։ Պաշտպանի պնդումները, որ օրենքով ինքը կարող է գործը քննության նախապատրաստելու փուլում նման միջնորդություն ներկայացնել, ապարդյուն անցան։ Այսօրվա նիստը հետաձգվեց, իսկ հաջորդը նշանակվեց մարտի 26-ին։