Մետաղական օգտակար հանածոների արդյունահանման թույլտվությունները հետաձգելու նախագիծը չստացավ ԱԺ հանձնաժողովի հավանությունը
Ազգային ժողովի տնտեսական հարցերի հանձնաժողովը բացասական եզրակացություն տվեց մետաղական օգտակար հանածոների արդյունահանման թույլտվությունները 2 տարով արգելելու պատգամավորների առաջարկին:
Նախագծի հեղինակներն են «Իմ քայլը» խմբակցության պատգամավորներ Մերի Գալստյանը, Վարազդատ Կարապետյանը և ԱԺ փոխխոսնակ Լենա Նազարյանը:
«Առաջարկում ենք 2 տարով դադարեցնել մետաղական օգտակար հանածոների արդյունահանման բացառապես նոր թույլտվությունների տրամադրումը՝ հաշվի առնելով հետևյալ գործոնները՝ ընդերքի օրենսդրության ներկայիս վիճակը և այն առանցքային բացերը, որոնք մեծ ռսիկեր են առաջացնում պետության համար: Երկու տարվա ընթացքում կառավարությունն ու խորհրդարանը պետք է աշխատեն ոլորտի հստակ ռազմավարություն մշակելու ուղղությամբ՝ դրանից բխող օրենսդրական բարեփոխումներով»,- ասաց Մերի Գալստյանը:
Ըստ հիմնական զեկուցողի՝ նախագիծը օրհասական է՝ պայմանավորված ոլորտի գործունեության երկարաժամկետ ազդեցություններով, այդ ազդեցությունների անդառնալիությամբ և պետության համար երկարաժամկետ ռիսկերով:
«Այս փոփոխությունը կոչված է հնարավորինս նվազագույնի հասցնել պետության համար սպասվող ռիսկերն այդ ազդեցունների համատեքստում»,- ասաց Գալստյանը:
Նրա խոսքով՝ առաջարկվող 2 տարվա դադարը չի վերաբերում այն տնտեսվարողներին, որոնք արդեն հայտ ներկայացրել են կամ ունեն ստացած թույլտվություն:
Նախագծի հարակից զեկուցմամբ հանդես եկավ տարածքային կառավարման և ենթակառուցվածքների փոխնախարար Լիլիա Շուշանյանը՝ ասելով, որ կառավարությունը բացասական եզրակացություն է տվել նախագծին: Փոխնախարարի խոսքով՝ արդարադատության նախարարությունն իր հիմնավորումներում նշել է, որ առաջարկը հակասում է Սահմանադրությանը:
«Մի ամբողջ գործունեություն արգելափակվում է, որի համար ընդունված են օրենքներ, ինչպես՝ ձեռներցության իրավունքը, տնտեսական գործունեության իրավունքը: Նման արգելափակման համար որոշակիություն պահանջող սահմանափակումներ պետք է լինեն»,- ասաց Շուշանյանը:
Փոխնախարարի խոսքով՝ նման փոփոխությամբ բացահայտ ազդակ է տրվում տնտեսական անհեռանկարության վերաբերյալ:
Պատգամավորները ևս անդրադարձան տնտեսական ֆակտորին՝ ընդգծելով, որ այս փուլում այնքան էլ նպատակահարմար չէ նման նախագիծն ընդունելը:
Հանձնաժողովի նախագահ Բաբկեն Թունյանի կարծիքով՝ այնպես չէ, որ տնտեսական նման իրավիճակում որևէ ընկերություն ցանկանալու է հանք շահագործել:
«Էնպես չէ, որ հերթ են կանգնել; Նաև 2016-ից հետո մետաղական հանքարդյունաբերության լիցենզիա չի տրվել: Բացի դա սա խտրական վերաբերմունք է: Ինչի ցեմենտի արդյունահանմամբ զբաղվող ընկերություններին չենք ներառում, ո՞վ ասեց որ մետաղական ընկերություններն ավելի վտանգավոր են: Սա կոշտ միջոցառում է, հատկապես էս փուլում մեծ բացասական մեսիջ ենք տալիս»,- ասաց Թունյանը;
Նախագիծը դրվեց քվեարկության և չստացավ հանձնաժողովի հավանությունը:
Մեկնաբանել