Երեկ` մարտի 3-ին, մոտ 200 ախթալացիներ, այդ թվում նաև լեռնահարստացման կոմբինատի ներկա և նախկին աշխատողներ, ժողով էին հրավիրել կոմբինատի տնօրինության հետ իրենց պահանջները քննարկելու համար:

Ժողովին մասնակցում էին նաեւ ԱԺ հանրապետական պատգամավոր Կարեն Սարիբեկյանը, Ախթալայի քաղաքապետ Հայկազ Խաչիկյանը և նրա եղբայրը`Սոցիալական ծառայության նախկին պետ Վազգեն Խաչիկյանը: 

Հիշեցնենք, որ օրեր առաջ կոմբինատի աշխատակիցները երկրի նախագահին դիմել էին բաց նամակով, որում բարձրացրել էին ինչպես իրենց աշխատավարձերի, այնպես էլ անվտանգության հարցերը:

Վազ գեն Խաչիկյանը իր ելույթում նշեց, որ ԼՀԿ-ի նկատմամբ Խաչիկյան եղբայրները որևէ ակնկալիքներ չունեն, ընդամենը պայքարում են ախթալացիների իրավունքների համար: «Ըստ նախաձեռնող խմբի` ժողովի հիմնական նպատակներից մեկը ԼՀԿ-ի  սեփականատերերին ընդդիմախոս արհեստակցական միության ստեղծումը պետք է լիներ»,- ասաց ժողովը վարող Հովիկ Փարսադանյանը:

Սակայն լեռնահարստացման կոմբինատի ղեկավարները աշխատողների հետ հանդիպելու հրավերը մերժել էին, որի պատճառով էլ փոխվեց ժողովի ուղղվածությունը:

Հովիկ Փարսադանյանը ներկաներին կոչ արեց անկաշկանդ խոսել ԼՀԿ-ի սեփականատերերի կողմից իրենց իրավունքների ոտնահարման փաստերի շուրջ: Իրենց ելույթներում Վազգեն Խաչիկյանը, Հովիկ Փարսադանյանը և էլի ուրիշներ առաջարկեցին փոխել ԼՀԿ-ի սեփականատեր Մադլեն Թաշճյանին:

«Մինչև սեփականատիրոջ փոփոխություն չլինի, արդեն մենք մեր կաշվի վրա զգացել ենք, մեր պահանջները դժվար թե դրական լուծումներ ստանան»,- ասաց Հովիկ Փարսադանյանը:

Իր ելույթում Ախթալայի հանքի առաջին տեղամասի նախկին պետ Սամվել Շախկյանը, ով մի քանի տարի առաջ հաշմանդամ է դարձել իր աշխատավայրում և այդ պատճառով զրկվել աշխատանքից և առ այսօր չի թոշակավորվել,  անդրադառնալով փետրվարի 25-ին հանքում զոհված Գարիկ Աղջյանի մահվանը, անթույլատրելի համարեց հանքում էլեկտրաքարշից գլուխը հանելը: Ըստ Ս. Շախկյանի` Գարիկն այդ մասին չի հրահանգավորվել: Սամվել Շախկյանն ասում էր, որ կոմբինատի սեփականատերերը թալանում են  մեր ազգային հարստությունը, մինչդեռ ժողովուրդը դրանից ոչինչ չի ստանում: Լեռնահարստացման ֆաբրիկայի նախկին պետ Սահակ Ալեքսանյանը իր խոսքում ասաց, որ բանվորների իրավունքների ոտնահարումը ԼՀԿ-ում նոր չէ:

Գարիկ Ջաղինյան	Վահագն Դարչինյան

«Դեռ 2006 թ.-ին ես Տեր-Պողոսյանից պահանջել եմ աշխատանքային տեղամասերում ապահովել աշխատողների կյանքի անվտանգությունը, վճարել գիշերային աշխատանքի համար, որի պատճառով էլ վտարվել եմ աշխատանքից»,- ասաց նա: Ֆլոտատոր Գարիկ Ջաղինյանը ներկայացրեց ֆաբրիկայում տիրող ներկա իրավիճակը. «Մեր հիմնական բողոքն այն է, որ ներկայումս ոչ մի ներդրում չի կատարվում կոմբինատում: Աշխատողների հանդեպ տիրում է ոչ նորմալ վերաբերմունք»,- ասաց նա:

ԼՀԿ-ի  գլխավոր արտադրամասի հերթափոխի վարպետ Վահագն Դարչինյանը  հայտնեց, որ իր աշխատանքային պարտականությունների մեջ մտնում է ջարդման արտադրամասի աշխատանքի վերահսկելը. «Գնում ես ջարդման արտադրամաս, տեսնում ես արտադրամասն աշխատում է, բայց մարդիկ չեն երևում: Այսինքն` այնքան թոզ ա, որ աշխատողները իրար չեն տեսնում: Ղեկավարության կողմից միջոցառումներ չեն ձեռնարկվում արտադրամասի փոշեհեռացման համար, որպեսզի փոշին մարդկանց առողջությունը չվնասի»,- ասաց Վահագնը և անարդարացի համարեց նման պայմաններում աշխատողների համար 37 հազար դրամ աշխատավարձի և նույնքան էլ առոջության վնասի փոխահատուցում սահմանելը:

Ֆաբրիկայի հերթափոխի էլեկտրիկ Աղասի Քոչարյանը նույնպես իր աշխատանքային պայմանները շատ վատ գնահատեց. «Ամենացավալին այն է, որ ֆաբրիկայի ղեկավարության կողմից մենք աջակցություն չենք ստանում: Եթե այդ աջակցությունը ապահովված լիներ, Գարիկ Աղջյանի մահվան ցավալի դեպքը ֆաբրիկայում չէր արձանագրվի»:

Աղասի Քոչարյանը նույնպես կողմ էր ԼՀԿ-ի սեփականատիրոջ փոփոխությանը. «Ինձ թվում է` ֆաբրիկայում աշխատող էդպիսի մարդ չկա, որ դրան կողմ չլինի, որովհետև մեր դրված պահանջները նրանց կողմից չեն կատարվում»:

Աղասին կարծում է նաև, որ բանվորների համար բոլորովին կապ չունի, թե ով կլինի ֆաբրիկայի սեփականատերը: Ըստ նրա` բանվորները կարևորում են բարձր աշխատավարձն ու աշխատանքային նորմալ պայմանները: 

Իր ելույթում պատգամավոր Կարեն Սարիբեկյան կոչ արեց լինել միաբան և խոստացավ լինել նրանց կողքին:

Ախթալայի քաղաքապետ Հայկազ Խաչիկյանը նախագահ Սերժ Սարգսյանին ուղղված Ախթալայի ԼՀԿ-ի բանվորների բաց նամակի ընթացքի մասին «Հետքին» հայտնեց, որ  բաց նամակի արձագանքն արդեն կա:

«Դրա հետ կապված` մարտի 6-ին Լոռու մարզպետ Արթուր Նալբանդյանի կողմից հրավիրվելու է հանդիպում ԼՀԿ-ի  գլխավոր տնօրեն Մադլեն Թաշճյանի մասնակցությամբ: Հանդիպմանը մասնակցելու են ԼՀԿ-ի այն ակտիվ բանվորները, ովքեր նախաձեռնել էին բանվորների բողոքի ակցիան: Ես նույնպես` որպես  Ախթալայի քաղաքապետ, ներկա եմ լինելու այդ հանդիպմանը: Տեղյակ եմ, որ հանդիպմանը հրավիրված է նաև մեր ընտրատարածքի պատգամավոր Կարեն Սարիբեկյանը»,- ասաց քաղաքապետը: