Բանաստեղծ, էսսեագիր Վիոլետ Գրիգորյանը «Հետքի» հետ զրույցում ասաց, թե ընտրությունները շատ կարեւոր են, դրանք ժողովրդավարական հասարակության կարեւոր բաղադրչներից մեկն են, բայց գերսեւեռվածությունը եւ ընտրությունները դարձնել ժողովրդավարության միակ խնդիրը, որի վրա ծախսվում է ամբողջ ռեսուրսը, «այդքան էլ օգտակար չէ»:

«Հավասարապես պետք է ուշադրություն դարձնեն ժողովրդավարության մյուս բաղադրիչներին էլ, ոչ թե դեկլարացնել, այդ դրանց իրական բովանդակությունը հնարավորինս շատ լուծել, քննարկել: «Խոսքի ազատություն» բառերն այդքան կարեւոր չեն, ինչքան դրանց բովանդակությունը կոնկրետ դեպքերի համար, որովհետեւ, ինչպես տեսնում ենք, օրինակ, Ֆրանսիայի կողմից ցեղասպանությունները ժխտելու համար պատասխանատվություն սահմանող օրենքի դեպքում խնդիրները բարդացան: Արդյոք մենք պատրա՞ստ ենք այդ բարդությամբ քննարկելու հարցերը, թե՞ մենք չենք կարող այդքան խորանալ, լինել այդ արժեքների կրողը»,-ասում է Վիոլետ Գրիգորյանը:

Նրա ասելով` այդ հարցերի շուրջ քննարկումների եւ քննադատության համար առողջ մթնոլորտ է պետք: «Բավական է ընտրություններով շատ չզբաղվես, շատ չխոսես այդ մասին ու ասեն, թե դու ժողովրդավարության մասին չես մտածում: Շանտաժից ազատ մթնոլորտ է պետք: Խոսքի ազատության համար ոչ միայն գրաքննությունից, այլեւ հասարակական կուսակցական ճնշումից ազատ տարածք է պետք, որ բոլոր այն մարդիկ, որոնք կարծիք ունեն, հանգիստ կարողանան արտահայտվել` առանց բանադրվելու ու շանտաժի ենթարկվելու»,-ավելացրեց Վիոլետ Գրիգորյանը:

Մինչեւ հիմա ընտրությունները Հայաստանում ոչինչ չեն փոխել, կարծում է Վիոլետ Գրիգորյանը, բայց  նա չի ցանկանում կանխագուշակել, որ առաջիկայում էլ ոչինչ չի փոխվելու: «Իհարկե, ես լավատեսություն չունեմ, բայց որոշ օբյեկտիվ պատճառներ կան փոփոխությունների համար՝ անկախ մեր կուսակցությունների, տարբեր խմբերի, քաղաքական կամքի, ցանկության ռեսուրսների, որ կներդրվեն: Ասենք՝ Եվրամիությանն անդամակցելու համար ուզած-չուզած որոշ քայլեր պիտի արվեն: Կարեւոր կլիներ, որ հասարակությունը ձեւական քայլերի տակ բովանդակություն մտցներ, իրական բովանդակություն տեսներ եւ ասեր՝ այ, ես սա եմ ուզում, ոչ թե նա, որը ցուցադրվում է»,-նշում է բանաստեղծը:

Ինչ վերաբերում է ընտրակաշառքին, ապա Վիոլետ Գրիգորյանն այնքան էլ չի մեղադրում գումար վերցնողներին: «Շատերն ասում են՝ վա՜յ, մեր ժողովուրդը 5000 դրամանոց ժողովուրդ է, բայց շատ ավելի լավ կլինի մտածել, թե ժողովուրդն ինչի՞ համար է այդպես մտածում: Հասարակության մեջ տարբեր խավեր ինչի՞ համար են այդպես մտածում, բա հետաքրքիր չի՞ իմանանք, թե ինչի՞ համար են այդպես կողմնորոշվում եւ արդյոք եթե այլընտրանքը տեսնեին, գումարը կհամարեի՞ն կարեւոր: Արդյոք սա գնահատական չէ՞, որ գումար վերցնողներն այլընտրանք չեն տեսնում, քաղաքական ուժերի միջեւ տարբերություն չեն տեսնում: Ինչպես ասում են՝ արտագաղթն էլ ոտքով քվեարկություն է, դա էլ է քվեարկության տեսակ: Եթե մարդը նախընտրում է փողը, դա քվեարկության տեսակ է: Հեգնելու, բարոյախոսություն, քարոզ կարդալու փոխարեն, պետք է ընդունել, որ սա ընտրություն է՝ մերժել քաղաքական ուժերին եւ համարել, որ սա ավելի ռեալ ու կարեւոր է»,-ավելացրեց Վիոլետ Գրիգորյանը:

Լուս.` Վ. Գրիգորյանի «Ֆեյսբուք»-ի օգտատետրից