Հարգելի բնապահպաններ,

Գրում եմ ձեզ Հոլանդիայի «Գլաձոր» հայ ուսանողական կազմակերպության անունից: Վերջին երեք շաբաթների ընթացքում մեծ հետաքրքրությամբ հետևում ենք ձեր բողոքի ակցիաներին Երևանում ի պաշտպանություն Մաշտոցի պուրակի: Հիացած ենք ձեր քաջությամբ, կամքի ուժով և միասնականությամբ:

Ձեր գործն անգին է և պետք է ոգեշնչի բոլոր հայերին Հայաստանում և Հայաստանի սահմաններից դուրս: Մեր կարծիքով յուրաքանչյուր հայի պարտքն է մտածել վաղվա Հայաստանի մասին ու հոգալ դրա համար:

Մենք միանում ենք ձեր ազնիվ պայքարին առողջ Հայաստան կերտելու, նրա գեղեցիկ բնության, մշակույթի և պատմության պահպանման համար:

Ցավոք, այսօրվա իշխանությունները նույն հիացմունքի խոսքերին չեն կարող արժանանալ, բայց պահն է հասել, որ բոլորս՝ ծեր թե մանուկ, Հայաստանում թե Հայաստանից դուրս, միանանք և ուս ուսի տված, միմյանց ձեռքն ամուր բռնած՝ միաձայնենք «Մենք ենք մեր քաղաքի տերը»:

Սիրելի բնապահպաններ, դուք մենակ չեք: Եվ սփյուռքում գտնվելը երբեք մեզ չի խոչընդոտի սատարելու ձեզ:

Եվ, մեկ անգամ ևս.

Մարդ կա՝ ելել է շալակն աշխարհի,
Մարդ կա՝ աշխարհն է շալակած տանում...

Հարգանքներով՝
Անի Բաբաջանյան
«Գլաձոր» հայ ուսանողական կազմակերպության քարտուղար