Մահացել է Քշիշտոֆ Պենդերեցկին
Կրակովում մահացել է լեհ հայտնի կոմպոզիտոր, դիրիժոր Քշիշտոֆ Պենդերեցկին։ Նա 86 տարեկան էր։ Լեհաստանի մշակույթի նախարարությունը հայտնել է, որ կոմպոզիտորը մահացել է ծանր երկարատև հիվանդությունից հետո։
It is with great sadness that we inform you of the passing of the great Maestro Krzysztof Penderecki...
— Culture.pl (@culture_pl) March 29, 2020
His memory will live on forever in his music!https://t.co/WhyyyTW3bi pic.twitter.com/9gVksetcvx
Քշիշտոֆ Պենդերեցկին մերօրյա ամենահայտնի կոմպոզիտորներից մեկն էր, «Գրեմմի»-ի քառակի դափնեկիր ։ Նրա ստեղծագործությունները դարձել են մի շարք ֆիլմերի սաունդթրեքեր։
Հայտնի կոմպոզիտորը բազմիցս հանդես է եկել նաև Հայաստանում։ Հայաստան իր այցելություններից մեկի ժամանակ նա պատմել է, որ ունի հայկական արմատներ։ Մաեստրոն խոստովանել էր, որ իրեն քառորդ հայ է զգում, քանի որ իր տատն ազգությամբ հայ էր։
Կոմպոզիտորի մահվան կապակցությամբ ցավակցական հեռագիր է հղել վարչապետ Նիկոլ Փաշինյանը։ Ցավակցական հեռագրում մասնավորապես ասված է․
«Ցավով տեղեկացա լեհ մեծանուն կոմպոզիտոր և երաժշտարվեստի ռահվիրա Քշիշտոֆ Պենդերեցկու մահվան մասին: Նա հիրավի 20-րդ դարի, ինչպես նաև մեր դարաշրջանի երկու տասնամյակների դասական երաժշտության ամենակարկառուն ներկայացուցիչներից էր: Պենդերեցկու ստեղծագործություններին քաջածանոթ էին աշխարհի բոլոր անկյուններում, իսկ դրանց կատարումներով հանդես էին գալիս հայտնի նվագախմբեր և մենակատարներ: Դրա վառ վկայություններն են բազմաթիվ միջազգային երաժշտական մրցանակները և պետական ու հանրային մակարդակով դրսևորված գնահատանքը:
Տաղանդաշատ ստեղծագործողը սերտ կապեր էր պահպանում իր նախնիների հայրենիքի` Հայաստանի հետ և տարբեր առիթներով այցելում: Նրա ներդրումը համաշխահային երաժշտարվեստին մշտապես հավուր պատշաճի գնահատվել է նաև Հայաստանում:
Պենդերեցկու հսկայական երաժշտական ժառանգությունը վստահաբար կշարունակի ապրել` հարստացնելով մեզանից յուրաքանչյուրին»:
Կրթության, գիտության, մշակույթի և սպորտի նախարար Արայիկ Հարությունյանը ֆեյսբուքի իր էջում գրել է․ «Նրա նորարական երաժշտական լեզվի, էքսպրեսիվ երաժշտական ձևերի, նրա արվեստի հոգևոր բովանդակության մասին շատ է գրվել և ավելի շատ է գրվելու ապագայում: Երախտագիտության խորին զգացումով ենք հիշելու նրա այցերը Հայաստան՝ «Երևանյան հեռանկարների», Արամ Խաչատրյանի անվան մրցույթի, «Հովեր» երգչախմբի, ֆիլհարմոնիկ նվագախմբի հետ համագործակցության շրջանակներում»։
Պենդերեցկին ծնվել էր 1933 թվականի նոյեմբերի 23-ին, Լեհաստանի Դեմբիցե քաղաքում։ Կոմպոզիտորի առաջին խոշոր ելույթը տեղի էր ունեցել 1959 թվականին Վարշավայի աշնանային փառատոնում։ Իր ստեղծագործություններում նա կիրառել է ինչպես սիմֆոնիկ երաժշտություն, այնպես էլ ժամանակակից օպերա և ավանգարդ։ Նրա կյանքում մեծ դեր է ունեցել նաև հոգևոր երաժշտությունը։ Կոմպոզիտորը վերջին անգամ Հայաստան էր ժամանել 2019 թվականի նոյեմբերին։
Մեկնաբանել