Տեսանյութեր
Լուսանկարներ
Կրթական ծրագիր 2 զորամասում. 172 ասպիրանտ, մագիստրոս և դասախոս կցվել է զինծառայողներին
ՀՀ վարչապետ Տիգրան Սարգսյանը պաշտպանության նախարար Սեյրան Օհանյանի ուղեկցությամբ հանդիպել է Երևանի զորամասերից մեկի զինծառայողներին և ներկայացրել զինված ուժերում իրականացվող կրթական ծրագիրը:
Ծրագրի նպատակն է զարգացնել զորացրվող զինծառայողների մասնագիտական հմտություններն ու առանձին ուսումնական առարկաների գծով գիտելիքները և նրանց նախապատրաստել բուհեր, նախնական և միջին մասնագիտական ուսումնական հաստատություններ ընդունվելուն:
«Պետությունը կանգնելու է այն զինծառայողների կողքին, ովքեր ցանկանում են գիտելիքներ ստանալ՝ ուսումը բարձրագույն ուսումնական հաստատություններում շարունակելու համար: Մենք պետք է օգնենք ձեզ զինծառայության ընթացքում կողմնորոշվել կրթության և մասնագիտացման հարցում: Մինչ զորացրվելը պետք է կարողանանք ձեզ հետ միասին հստակեցնել, թե ինչով եք ցանկանում զբաղվել բանակից հետո: Եթե դուք ցանկանում եք հստակ աշխատանք, և դրա համար անհրաժեշտ են լինելու կարճաժամկետ վերապատրաստման դասընթացներ, ապա պետությունը կրկին կլինի ձեր կողքին և կօգնի նաև այդ հարցում»,- ասել է Տիգրան Սարգսյանը:
Բուհ ընդունվելու կրթական նախապատրաստական աշխատանքներ իրականացնելու նպատակով՝ զինծառայողներին են կցվելու Հայկական պետական մանկավարժական համալսարանի և 6 այլ բուհի 172 ասպիրանտ, մագիստրոս և երիտասարդ դասախոս:
Կառավարության կայքի տեղեկացմամբ՝ կրթական ծրագիրն առայժմ կրում է պիլոտային բնույթ և դեռևս կիրականացվի հանրապետության երկու զորամասերում:
Մեկնաբանել