HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Սեդա Ղուկասյան

13 միլիոն 400 հազար եվրո արժողությամբ վարկային համաձայնագիր` 7 մարզերի համայնքապատկան ճանապարհների վերանորոգման համար

Ազգային ժողովի ֆինանսավարկային և բյուջետային հարցերի մշտական հանձնաժողովը դրական եզրակացություն տվեց Կառավարության ներկայացրած Հայաստանի Հանրապետության ու Վերակառուցման և զարգացման բանկի միջև վավերացված «Կենսական նշանակության ճանապարհային ցանցի բարելավման ծրագրի երկրորդ լրացուցիչ ֆինանսավորում» վարկային համաձայնագրին:

Վարկային համաձայնագիրը վավերացվել է 2019 թվականի հոկտեմբերի 10-ին:

Վարկային համաձայնագրի առաջին փուլով տրամադրվել է 170 միլիոն եվրո գումար, և այն ուղղվել է 211 կմ ճանապարհի հիմնանորոգմանը: Տարածքային կառավարման և ենթակառուցվածքների նախարար Սուրեն Պապիկյանի խոսքով` հիմնանորոգումը հիմնականում համայնքներում է եղել, ուստի ծրագիրը կենսական նշանակություն ունի հեռավոր համայնքների համար: Նախարարը նաև մանրամասնեց` 41 կմ-ը խնայված միջոցների հաշվին է արվել:

Վարկային համաձայնագրի երկրորդ փուլով վերականգնվելու է շուրջ 65 կմ երկարությամբ լրացուցիչ ճանապարհ՝ ծրագրի շրջանակներում վերականգնված ճանապարհների ընդհանուր երկարությունը հասցնելով մոտ 450 կմ-ի: Իրականացվելու է ճանապարհների վերականգնման աշխատանքների տեխնիկական հսկողություն, տեխնիկական աուդիտ, ճանապարհային ցանցի համար բնական աղետների վտանգի և ռիսկի գնահատում` բացահայտելու սողանքների, քարաթափումների վտանգը:

Այս փուլում տրամադրվելու է 13 միլիոն 400 հազար եվրո:

Նախարարի խոսքով` վարկի առաջին փուլով ֆինանսավորվել են նաև երկրորդ փուլի նախագծանախահաշվարկային աշխատանքները:

Վարկային համաձայնագրի շրջանակում ճանապարհաշինարարական աշխատանքներ իրականացվելու են Արագածոտնի, Արմավիրի, Արարատի, Գեղարքունիքի, Լոռիի, Շիրակի և Սյունիքի մարզերում:

Նախագծի հարակից զեկուցող ԱԺ պատգամավոր Արտակ Մանուկյանը ողջունեց Կառավարության քայլերը, որոնք միտված են կապիտալ ծախսերի իրականացմանը, ինչն էլ իր հերթին կարող է նպաստել տնտեսական աճի հնարավորություններն ընդլայնելուն, ինչպես նաև հանրային ռեսուրսների կառավարման արդյունավետությունը բարձրացնելուն:

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter