Երեխայի հոգեբուժական օգնության և սպասարկման փոփոխություններ են նախատեսվում
Առողջապահության նախարարությունը նախատեսում է փոփոխություններ կատարել երեխայի հոգեբուժական օգնության և սպասարկման ոլորտում։
Նախարարությունն իրավական ակտերի նախագծերի հրապարակման միասնական կայքում «Երեխայի իրավունքների մասին» օրենքում փոփոխություն կատարելու նախագիծ է ներկայացրել։
Մասնավորապես՝ նախարարությունն առաջարկում է օրենքով սահմանել, որ երեխայի հոգեբուժական օգնությունը և սպասարկումն իրականացվելու է նրա օրինական ներկայացուցչի գրավոր իրազեկված համաձայնության (դիմում) դեպքում։
Իսկ 16 տարին լրացած հոգեկան առողջության խնդիր ունեցող երեխան իրավունք է ունենալու տալ կամավոր իրազեկված համաձայնություն՝ բժշկական միջամտություն ստանալու կամ դրանից հրաժարվելու վերաբերյալ, եթե բժշկի կարծիքով նա ունակ է հասկանալ բժշկական միջամտության կամ դրա բացակայության հնարավոր հետևանքները։
Երեխայի կամ անգործունակ ճանաչված անձի հոգեբուժական օգնությունը և սպասարկումը իրականացնելիս նրանց կարծիքը լսելը պարտադիր է լինելու:
Առողջապահության նախարարությունը «Երեխայի իրավունքների մասին» օրենքի փոփոխությունը պայմանավորել է այն Սահմանադրությանը համապատասխանեցնելու անհրաժեշտությամբ:
Նախարարությունն ընդգծել է՝ Սահմանադրությամբ սահմանված է, որ երեխան իրավունք ունի ազատ արտահայտելու իր կարծիքը, որը, երեխայի տարիքին և հասունության մակարդակին համապատասխան, հաշվի է առնվում իրեն վերաբերող հարցերում:
«Սահմանադիրը հստակ պահանջ է դրել, որպեսզի երաշխավորվի երեխայի կարծիքը ցանկացած հարցի վերաբերյալ ազատ արտահայտելու իրավական հնարավորությունը: Սակայն այդ կարծիքը, երեխայի տարիքին և հասունության մակարդակին համապատասխան, պարտադիր պետք է հաշվի առնվի միայն այն դեպքերում, երբ հարցը վերաբերում է իրեն՝ երեխային»,- հայտնել է առողջապահական գերատեսչությունը:
Նախարարության հաղորդմամբ՝ Սահմանադրական դատարանն արձանագրել է, որ «երեխայի տարիքին և հասունության մակարդակին համապատասխան» սահմանադրական ձևակերպումից բխում է, որ երեխայի կարծիքի որոշիչ լինելու աստիճանը կախված է կոնկրետ հանգամանքներից՝ երեխայի տարիքից և հասունության մակարդակից, որը տարբեր անձանց մոտ կարող է տարբեր լինել:
«Ուստի յուրաքանչյուր կոնկրետ դեպքում անհրաժեշտ է գնահատել երեխայի տարիքը և հասունության մակարդակը, որպեսզի հնարավոր լինի գնահատել երեխայի՝ իր հոգեկան առողջության վիճակը գիտակցելու, իր հոգեկան անձեռնմխելիությանը բժշկական միջամտության կամ դրա բացակայության հնարավոր հետևանքները հստակ հասկանալու և կանխատեսելու ունակությունը»,- նախագծում նշել է Առողջապահության նախարարությունը։
Մեկնաբանել