Ազգային Ժողովի «Բարգավաճ Հայաստան» խմբակցությունն առաջարկում է արտակարգ դրություն հայտարարելու դեպքում վճարովի սովորող ուսանողների վարձաճարների հետաձգման օրենսդրական հնարավորություն:

Խմբակցությունը փոփոխություններ է առաջարկում «Կրթության մասին» մասին օրենքում:

Առաջարկվում է օրենքը լրացնել նոր հոդվածով, ըստ որի` արտակարգ իրավիճակի հիմքով արտակարգ դրություն հայտարարելու դեպքում վճարովի հիմունքներով սովորողների ուսման վարձի վճարումը հետաձգվում է մինչև արտակարգ դրության ավարտին հաջորդող չորրորդ ամսվա առաջին աշխատանքային օրը, եթե սովորողը գրավոր դիմում է ներկայացնում ուսման վարձի տարաժամկետման վերաբերյալ:

Նախագծի հիմնավորումներում նշվում է, որ արտակարգ դրության և դրանով պայմանավորված մի շարք սահմանափակումների պատճառով բարձրագույն ուսումնական հաստատությունների սովորողները հայտնվել են այնպիսի իրավիճակում, երբ իրականացվող սահմանափակումների առկայության հիմքով վերջիններս կամ իրենց ծնողները չեն աշխատում: Նման պայմաններում դժվարանում է բնակչության սոցիալ-տնտեսական իրավիճակը, առաջնային է դառնում առաջին անհրաժեշտության մթերքների ու այլ իրերի ձեռբերումը: Այս դեպքերում սովորողները չեն կարող ստանալ այնպիսի եկամուտներ, որոնք բավարար լինեն ուսման վարձը վճարելու համար: Վարձավճարները չվճարելն էլ հիմք է դառնում, որ վերջինններս հեռացվեն բուհից:

Նշվում է, որ նախագիծը ուղղված է նման դեպքերը կանխարգելելուն: «Միաժամանակ նախագծով սահմանված իրավակարգավորման ընդունման դեպքում ուսանողը պարտավոր է գրավոր դիմել իր ուսումնական հաստատությանը այս արտոնությունից օգտվելու համար, իսկ ուսման վարձի չվճարված մասը կամ այն ամբողջությամբ պետք է վճարված լինի արտակարգ դրության ավարտին հաջորդող չորրորդ ամսվա առաջին աշխատանքային օրը:

Հատկանշական է, որ սույն արտոնությունը կգործի բացառապես այն դեպքերում, երբ արտակարգ դրություն հայտարարվել է արտակարգ իրավիճակի հիմքով»,-նշվում է նախագծում:

Տեղեկացնենք, որ նախագիծն օրակարգ նեևառվելու համար պետք է ստանա գլխադասային հանձնաժողովի դրական եզրակացությունը:

Նախագծի հիմնական զեկուցող է ներկայացված «Բարգավաճ Հայաստան» խմբակցության պատգամավոր Շաքե Իսայանը:

Լուսանկարում` Շաքե Իսայանը: