«Էկոլոգիական անվտանգության ապահովման և ժողովրդավարության զարգացման» ՀԿ-ն հարցում է ուղարկել բնապահպանության նախարար Արամ Հարությունյանին՝ կապված Սյունիքի մարզում գտնվող Արծվանիկի պոչամբարի խնդիրների հետ: Նախարարությունը գրությանը չի պատասխանել, «և մեր համոզմունքը նախարարության անգործության վերաբերյալ ավելի է խորանում: Դա նաև պարունակում է կոռուպցիոն մեծ վտանգներ»,- նշված է ՀԿ-ի տարածած հաղորդագրության մեջ:

Հասարակական կազմակերպությունը նախարարին մասնավորապես հարցրել էր.

• Արծվանիկի թափոնավայրը ո՞ւնի անձնագիր տրված բնապահպանության նախարարության կողմից:
• Արծվանիկի թափոնավայրը ո՞ր վտանգավորության դասակարգին է պատկանում:
• Արծվանիկի թափոնավայրի տակ են անցել և անցնում են թափոնավայրի շրջակա մեծաքանակ անտառները: Ի՞նչ իրավական փաստաթղթերով է հիմնավորված թափոնավայրի շրջակա մեծաքանակ անտառների ոչնչացումը:
• Արծվանիկի թափոնավայրում պահպանվո՞ւմ են ՀՀ կառավարության 20 հուլիսի 2006 թվականի N 1026-Ն որոշման հողի բերրի շերտի հանման նորմերը:

Նույն գրությունը ՀԿ ուղարկել էր նաեւ «Զանգեզուրի պղնձամոլիբդենային կոմբինատ» ԲԲԸ-ի (ԶՊՄԿ) գլխավոր տնօրեն Մաքսիմ Հակոբյանին: Վերջինս հարցմանն արձագանքել է: Բայց «պատասխանը ուղղակի ստիպում է մեզ դիմել ԶՊՄԿ-ի սեփականատերերին` մասնավորապես ամենամեծ բաժնետեր Գերմանական Քրոնոմետ ընկերությանը՝ պահանջելով վերջ դնել բարբարոսական վերաբերմունքին հասարակ ժողովրդի և բնության նկատմամբ: