Նախագահ Սերժ Սարգսյանի եղբայր, ԵՊՀ աստվածաբանության ֆակուլտետի Հայ եկեղեցու պատմության եւ եկեղեցաբանության ամբիոնի վարիչ, հատուկ հանձնարարություններով դեսպան Լեւոն Սարգսյանն այսօր ներկա էր ՀՀԿ–ի 13-րդ համագումարին:

Լրագրողների հետ զրույցում Լեւոն Սարգսյանը նշեց, թե ոչ մի ձեւաչափով ցանկություն չի ունեցել մասնակցել առաջիկա խորհրդարանական ընտրություններին եւ լրատվամիջոցներից է տեղեկացել, որ ինքը «նման ցանկություն» ունի:

«Ես իմ տեղում ինձ լավ եմ զգում, աշխատում եմ արտգործնախարարությունում եւ գտնում եմ, որ ոչ պակաս կարեւոր գործ եմ կատարում»,-ավելացրեց նախագահի եղբայրը: Նա ասաց, թե ապագայում արտաքին գործերի նախարարի պաշտոնի հավակնություն էլ չունի:
Պատասխանելով «Հետքի» հարցին, թե առանձին ընտրատեղամասերում կա՞ն նախընտրելի պատգամավորի թեկնածուներ, որոնց առաջիկայում կսատարի, Լեւոն Սարգսյանը բացասական պատասխան տվեց:

Ինչ վերաբերում է Սարգսյանների մյուս եղբոր՝ ԱԺ պատգամավոր Ալեքսանդր Սարգսյանին, ով չի մասնակցելու առաջիկա խորհրդարանական ընտրություններին, Լեւոն Սարգսյանն ասաց, թե եղբայրը պատգամավոր չի ուզում ընտրվել' «որոշակի առողջական խնդիրներից ելնելով»: