Շիրակի մարզի ընտրատեղամասերում ընտրողների համամասնությունն ապահովելու նպատակով Կենտրոնական ընտրական հանձնաժողովը կատարել է փոփոխություններ: Տեղի է ունեցել երկու ընտարատարածքների` թիվ 34-ի եւ 35-ի վերաձեւում: Գյումրու Արցախ թաղամասում գտնվող թիվ 3-րդ մանկապարտեզում տեղակայված թիվ 28 ընտրատեղամասի 980 ընտրողներն այսուհետ քվեարկելու են ոչ թե թիվ 34 ընտրատարածքում առաջադրվող պատգամավորի, այլ թիվ 35 ընտրատարածքի առաջադրվող պատգամավորի կամ պատգամավորների օգտին:

Թիվ 34 ընտրատարածքային ընտրական հանձնաժողովի նախագահ Էդուարդ Բաղրամյանի փոխանցմամբ` նման փոփոխություններն անխուսափելի էին` կապված բնակիչների փաստացի հաշվառման և Գյումրու Մուշ-2 նոր թաղամասի կառուցման հետ:

«Ընտրական օրենսգրքով նախատեսված է յուրաքանչյուր տարին մեկ անգամ կատարել հաշվառված ընտրողների քանակի ճշտումներ,- ասում է Էդուարդ Բաղրամյանը,- սա ունի իր կարեւոր ու անհրաժեշտ պայմանը: Յուրաքանչյուր անգամ վերանայվում է մարզում տվյալ ընտրատարածքների ընտրողների թվային շարժը: Բնական է, որ ժամանակ առ ժամանակ մարդիկ դուրս են գրվում կամ նոր մարդիկ են գրանցվում: Ընտրատարածքներում բնակիչների աճ կամ նվազում է տեղի ունենում: Քանի որ ներկայում, ինչպես գիտեք, պայման է դրված, որ մարդու անձնագրային տվյալները եւ փաստացի բնակության վայրը պետք է համապատասխանեն, ապա հաշվառումից հետո անհրաժեշտություն եղավ նման տեղաշարժեր կատարելու»:

Դեռեւս անցած տարվա նոյեմբերից էր հստակեցված, որ թիվ 34 ընտրատարածքում կա ընտրողների թվի ավելցուկ: Մուշ-2 նորակառույցում 1050 բնակարանի բաշխումը ընտրողների տեղաշարժ էր գրանցել ոչ միայն թիվ 35, այլեւ թիվ 33 ընտրատարածքում: Թիվ 34 ընտրատարածքը միակն է, որ ընդգրկում է ողջ քաղաքը եւ բնականաբար մարդկային շարժը մեծ չափով ազդելու էր հենց այս ընտրատարածքի վրա: Թիվ 35 ընտրատարածքն ընդգրկում է քաղաքից 23 ընտրատեղամաս եւ Ախուրյանի նախկին տարածաշրջանի համայնքները:

«Նորակառույց թաղամասի պատճառով մեր ընտրատարածք տեղափոխվեցին թիվ 33-ի ու 35-ի ընտրողները: Մեր թիվը բնականաբար ավելացավ, իսկ ըստ Ընտրական օրենսգրքի, համամասնությունը պարտադիր պիտի պահպանել: Տեսեք՝ այս տարի մոտ 2000 բնակարան էլ պիտի շահագործվի նորակառույց թաղամասերում, բայց վստահ չենք, թե բնակիչները կհասցնեն վերագրանցվել իրենց նոր հասցեներում: Եթե այդպիսի բան տեղի ունենա մինչեւ մայիս ամիսը, ապա թվային տարբերությունը կրկին կմեծանա ընտրատարածքներում,-մտահոգվում է Էդուարդ Բաղրամյանը,- Մուշ թաղամասում ընտրողների թիվն այս պահին ավելացել է շուրջ 700 ընտրողով»:

Եթե նախկին ընտրությունների ժամանակ Մուշ-2 թաղամասում գործել է մեկ ընտրատեղամաս, ապա, պայմանավորված ընտրողների թվի ավելացման հետ, կավելանա նաեւ տեղամասերի թիվը: Այս հարցը դեռեւս քննարկման փուլում է, սպասում են քաղաքապետարանի առաջարկին տարածքի առումով: Քանի որ նորակառույց թաղամասը այնքան էլ հարուստ չէ հաստատություններով (դպրոց, մանկապարտեզ եւ այլն),  ընտրատեղամասի տեղակայման առումով շենքային խնդիրներ կան:

Կատարված ճշտումների ու վերաձեւումների արդյունքում թիվ 34 ընտրատարածքի ընտրողների թիվը 61.902 է: Նախորդ ընտրություններին թիվ 34 ընտրատարածքից մեծամասնականով ԱԺ պատգամավոր է ընտրվել ԲՀԿ-ական Մարտուն Գրիգորյանը, իսկ թիվ 35-ից` նույն կուսակցության ներկայացուցիչ Սամվել Բալասանյանը: