![](/static/articles/11/71/86/l-D4KSe4Sx0a.jpg)
Գերմանիայում 2008-2009թթ. ֆինանսական ճգնաժամից հետո գրանցվել է տնտեսության ամենախոշոր փլուզումը
Գերմանիայի Դաշնային Հանրապետությունում, COVID-19 համավարակի պայմաններում, 2008-2009 թվականների ֆինանսական ճգնաժամից հետո գրանցվել է տնտեսության ամենախոշոր փլուզումը։ Այդ մասին գրում է «Deutsche Welle» պարբերականը։
Մայիսի 15-ին Գերմանիայի դաշնային վիճակագրական գործակալությունը հայտնել է, որ 2020 թվականի առաջին եռամսյակում գերմանական տնտեսությունը, նախորդ եռամսյակի հետ համեմատած, կրճատվել է 2,2 տոկոսով։ Գործակալությունը նաև նշել է, որ վերջինս 2008-2009 թվականների ֆինանսական և տնտեսական ճգնաժամերից հետո տնտեսության ամենախոշոր փլուզումն է և երկրորդը՝ Գերմանիաների վերամիավորումից հետո։
Գերմանիայում առաջին եռամսյակի ընթացքում էականորեն կրճատվել են արտահանումը, սպառումը և ներդրումները։ «Կորոնավիրուսի համավարակի տնտեսական հետևանքները հանգեցրել են ռեցեսիայի»,- նշել են Գերմանիայի էկոնոմիկայի նախարարությունից։
Ի տարբերություն եվրագոտու մյուս խոշոր երկրների, Գերմանիան ավելի քիչ է տուժել համավարակից։ Մասնավորապես, Ֆրանսիայում, որը եվրագոտու երկրորդ խոշոր տնտեսությունն է, ՀՆԱ-ի կրճատումը կազմել է 5,8 տոկոս, իսկ Իտալիայում՝ 4,7 տոկոս։
Դեռ հունվար-փետրվար ամիսներին մի շարք ցուցանիշներ փաստում էին տնտեսության աշխուժացման մասին։ Սակայն ամեն ինչ կտրուկ փոխվել է մարտ ամսին, երբ երկրում ներդրվել են սահմանափակումներ, որոնք ուղղված էին կորոնավիրուսի համավարակի տարածման կանխարգելմանը։ Այդ ընթացքում փակվել են խանութները, հյուրանոցները, ռեստորանները և ֆաբրիկաները, չեղարկվել են հանրային բազմաթիվ միջոցառումներ։
Գերմանիայի էկոնոմիկայի նախարարության կանխատեսումներով՝ սահմանափակիչ միջոցառումների հետևանքներն առավել կազդեն երկրորդ եռամսյակի ցուցանիշների վրա։ «Commerzbank»-ը կանխատեսում է ավելի քան 11 տոկոս անկում, իսկ «Deutsche Bank»-ը՝ 14 տոկոս: 2020 թվականին Գերմանիային սպասվում է հետպատերազմական ողջ ժամանակաշրջանից հետո ամենախորը ռեցեսիան։ Գերմանիայի ՀՆԱ-ն կարող է կրճատվել մինչև 6,3 տոկոսով։
Լուսանկարում՝ Գերմանիայի ֆինանսական կենտրոն Մայնի Ֆրանկֆուրտ քաղաքը, Wikimedia Commons
Մեկնաբանել