Կորոնավիրուսի համավարակով պայմանավորված իրավիճակի, դրա տնտեսական հետևանքների, նոր մարտահրավերների հաղթահարման ուղիների քննարկման նպատակով նախագահ Արմեն Սարգսյանը հանդիպումների շարք է նախաձեռնել խորհրդարանական և արտախորհրդարանական ուժերի, հասարակական կազմակերպությունների, տարբեր ոլորտների մասնագետների հետ:

Ինչպես հաղորդում է նախագահի աշխատակազմի հասարակայնության հետ կապերի վարչությունը, այս շրջանակում Արմեն Սարգսյանն այսօր հանդիպում է ունեցել ՀՅԴ Հայաստանի գերագույն մարմնի ներկայացուցիչ Իշխան Սաղաթելյանի և ՀՅԴ Բյուրոյի անդամ Արսեն Համբարձումյանի հետ:

Հանդիպմանն անդրադարձ է կատարվել համավարակի հետևանքով ստեղծված իրավիճակին, տնտեսական դժվարություններին, դրանց հաղթահարման հնարավորություններին և ուղիներին: Զրուցակիցները համակարծիք են եղել, որ այս մարտահարվերը հնարավոր է հաղթահարել միայն ուժերի համախմբման միջոցով: ՀՅԴ ներկայացուցիչները ներկայացրել են իրենց տեսլականն իրավիճակը հաղթահարելու հնարավոր ճանապարհների մասին:

Ըստ տարածված հաղորդագրության՝ զրուցակիցները մտքեր են փոխանակել երկրի ներքին և արտաքին խնդիրների վերաբերյալ: Անդրադարձ է եղել նաև համազգային օրակարգին վերաբերող մի շարք հարցերի, այդ շրջանակում անցկացված և նախատեսվող, այդ թվում՝ Հայոց Ցեղասպանության 105-րդ տարելիցին, Սևրի դաշնագրի կնքման 100-ամյակին և Առաջին Հանրապետության առաջիկա տարեդարձին նվիրված միջոցառումներին: Հանրապետության նախագահին տեղեկություններ են ներկայացվել ՀՅԴ ծրագրած մի շարք միջոցառումների մասին, որոնք, համավարակով պայմանավորված, ժամանակավորապես հետաձգվել են: