Քննչական կոմիտեի տեղեկատվության և հասարակայնության հետ կապերի բաժնի հաղորդմամբ` 2020թ. մայիսի 16-ին՝ ժամը 00.30-ին Վանաձորի բժշկական կենտրոնից հաղորդում է ստացվել այն մասին, որ կրծքավանդակի և գոտկային շրջանի ծակած-կտրած թափանցող վերք ախտորոշմամբ բուժօգնության է դիմել Վանաձոր քաղաքի 27-ամյա բնակիչ:

Նույն օրը  27-ամյա բնակչի մայրը ոստիկանությունում հաղորդում է ներկայացրել այն մասին, որ 2020թ. մայիսի 15-ին՝ ժամը 21.35-ի սահմաններում իրենց շենքի բակում տեղի ունեցած վիճաբանության ժամանակ որդուն դանակահարել է նույն շենքի բնակիչը՝ ծնված 1995թ.:

Դեպքի առթիվ 2020 թվականի մայիսի 16-ին Քննչական կոմիտեի Լոռու մարզային քննչական վարչությունում Քրեական օրենսգրքի 112-րդ հոդվածի (դիտավորությամբ առողջությանը ծանր վնաս պատճառելը)  1-ին մասով հարուցվել է քրեական գործը: 27-ամյա երիտասարդը տուժող է ճանաչվել:

Կատարված քննչական գործողությունների և օպերատիվ-հետախուզական միջոցառումների արդյունքում պարզվել է, որ նշված հանցագործությունը կատարել է Վանաձոր քաղաքի բնակիչը՝ ծնված 1995թ.: Վերջինս ձերբակալվել է:

Նախաքննության ընթացքում կատարվել է դեպքի վայրի զննություն: Հայտնաբերվել են արնանման հետքեր, ագրավվել են հագուստներ, հարցաքննվել են մի շարք անձինք: Նշանակվել են դատաբժշկական փորձաքննություններ: 

Նախաքննությունը շարունակվում է:

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: