ԱՄՆ միլիարդատերերը կորոնավիրուսի համավարակի երկու ամիսների ընթացքում իրենց կարողությունն ավելացրել են շուրջ 15 %-ով։ Այդ մասին նշվում է հինգշաբթի օրը՝ մայիսի 21-ին հրապարակված հետազոտության մեջ, որն իրականացվել է «Americans for Tax Fairness»-ի և «Institute for Policy Studies»-ի վերլուծական խմբերի կողմից։ Մարտի 18-ից մայիսի 19-ն ընկած ժամանակահատվածում, ընդհանուր առմամբ, ԱՄՆ միլիարդատերերի գումարային կարողությունն ավելացել է 434 միլիարդ դոլարով՝ հասնելով 3, 382 տրիլիոնի։

Ընդհանուր աճի շուրջ 20 %-ն ապահովել են ԱՄՆ հինգ ամենահարուստ մարդիկ՝ «Amazon»-ի ղեկավար Ջեֆ Բեզոսը, «Microsoft»-ի հիմնադիրներից մեկը՝ Բիլ Գեյթսը, «Facebook»-ի հիմնադիր Մարկ Ցուկերբերգը, «Berkshire Hathaway»-ի ղեկավար Ուորեն Բաֆեթը և «Oracle»-ի համահիմնադիր Լարի Էլիսոնը։ Մասնավորապես, Բեզոսի կարողությունն ավելացել է 34,6 միլիարդ դոլարով (30,6 % աճ), Գեյթսինը՝ 8 միլիարդով (8,2 % աճ), իսկ Ցուկերբերգինը՝ 25,3 միլիարդով (46,2 % աճ)։

ԱՄՆ թոփ 30 միլիարդատերերի ցանկում տոկոսային ամենամեծ աճն ունեցել են կենցաղային ապրանքների «Menards» խանութների ցանցի սեփականատեր Ջոն Մենար կրտսերը (62,8 % աճ) և ձեռնարկատեր Իլոն Մասկը (48 % աճ)։

Հետազոտության մեջ նաև նշվում է, որ երկու ամսվա ընթացքում ավելացել է միլիարդատերերի թիվը։ Այսպես, եթե մարտին նրանց թիվը կազմում էր 614, ապա մայիսին՝ 630։ Ապրիլին ԱՄՆ-ն նոր միլիարդատերերի թվաքանակով աշխարհում երկրորդն էր՝ զիջելով միայն Չինաստանին։ 2009 թվականի ֆինանսական ճգնաժամից հետո, երկրում միլիարդատերերի թիվն ավելացել է 210-ով, որոնցից 61-ը ՏՏ ոլորտի մասնագետներ են։

Լուսանկարում՝ Ուորեն Բաֆեթը, Մարկ Ցուկերբերգը և Ջեֆ Բեզոսը