Aravot.am-ի ունեցած տեղեկություններով՝ գեներալ Սեյրան Սարոյանը կրկին որոշել է առաջադրվել մեծամասնական ընտրակարգով թիվ 19 ընտրատարածքում: Այն ընդգրկում է Էջմիածին քաղաքը և հարակից գյուղերը:

Սարոյանն այժմ պատգամավոր է հենց այդ ընտրատարածքից, որտեղ 2007-ին ՀՀԿ-ն պաշտոնապես սատարեց նրան՝ խաղից դուրս թողնելով ՀՀԿ-ական Հակոբ Հակոբյանին: Հակոբյանն արդեն իսկ հայտարարել է նույն ընտրատարածքում իր առաջադրման մասին:

Իր մտերիմների շրջանակում Սեյրան Սարոյանն անկեղծացել է՝ ասելով, որ ԱԺ-ում իր լինելը մեկ նպատակ ունի. ինքը ցանկանում է զբաղեցնել ՀՀ ԶՈւ գլխավոր շտաբի պետի պաշտոնը, իսկ խորհրդարանից այդ պաշտոնն, ըստ Սարոյանի, մեկ քայլ է:

ՀՀ ԶՈւ գլխավոր շտաբի պետի պաշտոնը ներկայումս զբաղեցնում է Յուրի Խաչատուրովը: Ասում են, որ գեներալն անգամ տարբեր ժամանակներում և տարբեր պատճառներով համակարգից հեռացված պաշտոնյաներին խոստացել է վերականգնել իրենց նախկին աշխատատեղերում, եթե վերջիններս իրենց աջակցությունը բերեն իր վերընտրության գործին:

Aravot.am-ը փորձեց այս տեղեկությունների վերաբերյալ պարոն Սարոյանի մեկնաբանությունը ստանալ: Aravot.am-ի հեռախոսազանգերին պատասխանած իր օգնականը տեղեկացրեց, որ նա զբաղված է և ազատ ժամանակ գտնելուն պես կկապվի մեզ հետ: Օրվա ընթացքում Սարոյանն այդպես էլ չզանգահարեց:

Իր պատգամավորության չորս տարվա ընթացքում Սեյրան Սարոյանն օրենսդիր աշխատանքով այդպես էլ չզբաղվեց: Նա շարունակում է ղեկավարել ՌԴ-ում գործող իր բիզնեսները: