Այս տարվա ապրիլի վերջի դրությամբ Հայաստանի համախառն միջազգային պահուստները կազմել են 2 մլրդ 491 մլն դոլար։ Ինչպես վկայում են Կենտրոնական բանկի տվյալները (ՀՀ ԿԲ), ապրիլի ընթացքում պահուստները կրճատվել են 91 մլն դոլարով կամ 3.5%-ով։ 

Իսկ տարեսկզբի (2019 թվականի դեկտեմբերի վերջին գրանցված ցուցանիշի) համեմատ՝ Հայաստանի միջազգային պահուստները կրճատվել են 359 մլն դոլարով կամ 12.6%-ով։

Պահուստների վիճակագրության մեջ ընդհանուր օրինաչափություն կարելի է նկատել. տարվա վերջին եռամսյակում դրանք  աճում են և հաջորդող տարվա սկզբից կրկին նվազում (տե՛ս ինֆոգրաֆիկան)։

Երկիրն այդ պահուստներով իր արտարժութային պարտավորություններն է կատարում։ Զգալի հատված ուղղվում է արտաքին պետական պարտքի սպասարկմանը։

2019 թվականի դեկտեմբերին ևս պահուստների էական աճ գրանցվեց։ Ըստ ԿԲ-ի ճշգրտված տվյալների՝ միայն դեկտեմբերի ընթացքում պահուստներն ավելացել են 475 մլն դոլարով կամ 20%-ով։ Իսկ արդեն հունվարից, ինչպես սպասվում էր, անկում գրանցվեց։ 

Հայաստանի միջազգային պահուստները գրեթե ամբողջությամբ արտարժույթով են, ոսկի չկա։ 2003 թվականի վերջին Կենտրոնական բանկը վաճառեց Հայաստանի պահուստային ոսկու ողջ պաշարը։