HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Սեդա Ղուկասյան

Անդրանիկ Քոչարյան. «Յուրի Խաչատուրովն ունի 2 օր ժամանակ հանձնաժողով ներկայանալու և մեր հարցերին պատասխանելու համար»

Զինված ուժերի գլխավոր շտաբի նախկին պետ Յուրի Խաչատուրովը օր առաջ պետք է գա ապրիլյան պատերազմի դեպքերը քննող հանձնաժողով:

Այս մասին խորհրդարանում` լրագրողների հետ զրույցում ասաց հանձնաժողովի նախագահ Անդրանիկ Քոչարյանը` շուրջ երկու ժամ ԱԳ նախկին նախարար Էդվարդ Նալբանդյանի` հանձնաժողովի  հետ տեսակապով ունեցած հանդիպումից հետո:

«Ես մի բան կարող եմ ասել էսօրվա հանդիպումից հետո` Յուրի Խաչատուրովը ունի երկու օր ժամանակ հանձնաժողով ներկայանալու և մեր հարցերին պատասխանելու համար: Յուրի Խաչատուրովը հանձնաժողովում պետք է պատասխանի հարցերին, դրանք էնքան կարևոր են, որ ես անում եմ այս հայտարարությունը»,-ասաց Քոչարյանը:

Քոչարյանի խոսքով` նախկին նախարարին լսելուց հետո հանձնաժողովի անդամները կոնկրետ հարցեր ունեն Յուրի Խաչատուրովին` բանակցային գործընթացի վերաբերյալ:

Հանձնաժողովի նախագահը հիշեցրեց, որ չի եղել որևէ նախկին կամ գործող պաշտոնյա, որը հրաժարվել է գալ հանձնաժողով, միակ հրաժարվողը եղել է Յուրի Խաչատուրովը:

«Պատահական չէ, որ ԱԳ նախկին նախարարին լսելուց հետո ես հայտարարում եմ, որ Յուրի Խաչատուրովը երկու օր ժամանակ ունի` հանձնաժողով գալու»,-ասաց Քոչարյանը` հավելելով, որ պատրաստ են ցանկացած ձևաչափով կազմակերպել հանդիպումը:

«Այլապես մեր եզրակացությունները կներկայացնենք առանց իրեն լսելու»,-ասաց նա:

Քոչարյանը հիշեցրեց, որ Յուրի Խաչատուրովի ենթակայությամբ ծառայություն մատուցած զինվորականները ևս եկել են հանձնաժողով, և տրամաբանական է, որ պատերազմի ժամանակ երկրի թիվ մեկ զինվորականը համարվող ԶՈՒ ԳՇ պետի պաշտոնը զբաղեցրած նույնպես հյուրընկալվի հանձնաժողովում:

Ինչ վերաբերում է այն հարցին, թե գոհ էին արդյոք Էդվարդ Նալբանդյանի պատասխաններից, Անդրանիկ Քոչարյանն ասաց.

«Պարոն Նալբանդյանը մեր հարցերին տվել է շատ դիվանագիտական պատասխաններ, բայց մեր հարցերն այնքան համապարփակ են եղել, մեզ համար հարցերն են կարևոր, իսկ պատասխանները համադրելու ենք մեր ձեռքի տակ եղած ամբողջ ինֆորմացիայով»:

Հիշեցնենք, որ հանձնաժողովի գործունեության ժամկետը լրանում է հունիսի 4-ին:

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter