Արդեն կարելի է ենթադրել, որ մայիսի 6-ի ընտրություններից հետո Ազգային ժողովը վերածվելու է «շոու-բիզնեսային» ու մի քիչ էլ օրենսդիր մարմնի: Որոշ օլիգարխների փոխարեն ՀՀԿ-ի հավանությամբ խորհրդարան կանցնեն դերասաններ, լրագրողներ, երգչուհիներ…

Հայտնի է, որ երգչուհի Շուշան Պետրոսյանը ՀՀԿ-ի համամասնական ցուցակով պատգամավոր դառնալու լուրջ հնարավորություններ ունի: Երգչուհին արդեն կայացրել է իր որոշումը և այսօր կամ վաղը ՀՀԿ-ի գրասենյակ պիտի ներկայացնի կուսակցության շարքերը համալրելու դիմում:

Դժվար է պատկերացնելը, թե Շուշան Պետրոսյանն ինչ պետք է անի Ազգային ժողովում կամ ինչպես է ներկայացնելու ժողովրդի շահերը, երբ բազմիցս դեմ է խոսել ժողովրդին: Նույն 2008թ. մարտի 1-ի ողբերգական իրադարձություններից հետո Շուշան Պետրոսյանը մեղադրեց բողոքի ձայն բարձրացնողներին:

Դեռ թարմ է 2011թ. ապրիլի 3-ին Մոսկվայի Կրեմլում կայացած «Տաշիր-2011» համահայկական երաժշտական մրցանակաբաշխության ժամանակ Շուշան Պետրոսյանի նվեր ստացած բնակարանի շուրջ բարձրացած աղմուկը: Երբ մի քանի խմբեր երգչուհուն և բնակարան ստացած մյուս արտիստներին կոչ արեցին բնակարանները հանձնել անօթևաններին, Շուշան Պետրոսյանը խիստ քննադատեց նման հայտարարություններ անողներին:

«Նման անկիրթ վերաբերմունք ես դեռ չեմ տեսել: Երբ մենք բարեգործությամբ ենք զբաղվում, ոչ ոք այդ մասին չի խոսում, սակայն երբ մեզ նվիրատվություն են անում, դա դառնում է օրվա գլխավոր թեման»,- ասել էր երգչուհին:

Սոցիոլոգ Գևորգ Պողոսյանը «Հետքի» հետ զրույցում ասաց, որ երգիչ-երգչուհիների, դերասանների կամ արվեստի ոլորտի մարդկանց մուտքը խորհրդարան սպասվող երևույթ էր, որովհետև հարևան երկրներում, Ռուսաստանում նորություն չէ արվեստի գործիչների մուտքը օրենսդիր մարմին:

«Նախ և առաջ այդ քայլերը միտված են փոխել հասարակության կարծիքը Հանրապետական կուսակցության նկատմամբ: Թարմացնելով շարքերը և ընդգրկելով մտավորականներին՝ ենթադրում եմ, որ նպատակ են հետապնդում ավելի լայն մասսաների հետաքրքրությունը շարժել և ընդլայնել իրենց ընտրազանգվածը: Սա ընդունված տեխնոլոգիական քայլ է, որը կիրառվում է տարբեր երկրներում»,- ասաց Գևորգ Պողոսյանը:

Սոցիոլոգի կարծիքով՝ մտավորական պատգամավորներ ունենալու դեպքում Ազգային ժողովի նկատմամբ էլ հասարակության վերաբերմունքը կփոխվի դեպի դրականը:

«Ավելի լավ է ընդգրկվեն հայտնի դեմքեր արվեստից, գրականությունից, մտավորականությունից, քան միայն բիզնեսից ու գործարար շրջանակներից: Բայց, իհարկե, ավելի լավ կլիներ, եթե հաջորդ քայլով խորհրդարանը լինի նեղ մասնագիտացված, և խորհրդարան գնային իրավաբաններ, գիտնականներ, սոցիոլոգներ: Իհարկե, լավից լավն էլ կա, բայց այս շարժը կարելի է դրական գնահատել»,- ավելացրեց Գևորգ Պողոսյանը: