Վարչապետ Տիգրան Սարգսյանի գլխավորությամբ Երևանի նորաբաց «Զանգակ» գրատանը տեղի է ունեցել գրականության բնագավառի զարգացմանը վերաբերող խորհրդակցություն:

Խորհրդակցությանը մասնակցել են մշակույթի նախարար Հասմիկ Պողոսյանը, ֆինանսների նախարար Վաչե Գաբրիելյանը և փոխնախարար Սուրեն Կարայանը, կրթության և գիտության փոխնախարար Մանուկ Մկրտչյանը, ՀՀ գրողների միության նախագահ Լևոն Անանյանը, խոշոր հրատարակչությունների, գրավաճառ ընկերությունների ղեկավարներ և գրականության ոլորտի այլ ներկայացուցիչներ:

«Մենք պարտավոր ենք խրախուսել, որ հայ քաղաքացին իր կյանքը տեսնի գրքերի աշխարհում: Դա հնարավորություն կտա նրանց լինել մտածող և ճիշտ կողմնորոշվել ժամանակակից աշխարհի փոփոխությունների ներքո: Մեր գերագույն նպատակն է, որ Հայաստանի Հանրապետության հասարակությանը կրկին սկսի գիրք կարդալ: Եթե այս խնդիրը կարողանանք լուծել, ապա որպես ազգ կունենանք ապագա: Սկսած դպրոցից՝ մենք պետք է խրախուսենք ընթերցանությունը, որպեսզի մեր երեխաները կարդալու սեր ունենան, ընդ որում, մենք պետք է թիրախավորենք ազգային գրականությունը: Գրքի ոլորտից առաջացած հարկային եկամուտները անհրաժեշտ է ուղղել այս նպատակի իրականացմանը»,- ասել է Տիգրան Սարգսյանը:

Նա նշել է, որ դա կլինի պետական ուղղակի սուբսիդիա՝ հայապահպանության և հայագիտության զարգացման գործում: Վարչապետն առաջարկել է մշակել ընթերցանության ազգային հայեցակարգ ու ձևավորել հասարակական խորհուրդ, որն էլ կմշակի ոլորտի զարգացմանն ուղղված քայլերն ու գործողությունները:

«Զանգակ» գրատունն ունի նաև թվայնացված գրականություն, դպրոցական էլեկտրոնային գրատախտակների կիրառությունն ապահովելու համար անհրաժեշտ ուսումնական նյութերի թվայնացված տարբերակներ և ժամանակակից տեխնոլոգիաների կիրառմամբ ստացված այլ հրատարակչական արտադրանք: Կառավարության կայքի հաղորդմամբ՝ գրատան հայեցակարգը կազմվել է գրավաճառ զարգացած ցանց ունեցող եվրոպական երկրներում գործող առաջատար գրախանութների փորձի համադրմամբ: