«Հայացք». «Վեգան» ու «Նորվիկը» մոլորեցնում են հաճախորդներին
«Վեգա» կենցաղային տեխնիկայի խանութի հետ համագործակցող «Նորվիկ» վարկային կազմակերպությունը մարդկանց բջջային հեռախոսներին այս օրերին ակտիվորեն հաղորդագրություններ է ուղարկում` կոչ անելով գնումներ կատարել «Վեգայից»: Հաղորդագրությունում նշվում է հետևալը. «Հարգելի «Նորվիկի» հաճախորդ, մինչև ապրիլի 7-ը «Վեգա» խանութներում ձևակերպեք ապառիկ տեղում, միայն անձնագրով, և ստացեք նվեր»: «Վեգան» էլ իր հերթին է հաղորդագրություններ ուղարկում` մարդկանց անուն-ազգանունները հաղորդագրությունում նշելով և տեղեկացնելով, որ հաճախորդները կարող են առանց կանխավճարի և առանց աշխատանքի վայրից տեղականք բերելու ապառիկ պայմաններով ապրանք վերցնել: Երբ մարդիկ հաղորդագրությունում նշված հեռախոսահամարով զանգահարում են խանութ, այնտեղից հաստատում են, որ 0% կանխավճարով և առանց աշխատավարձի մասին տեղեկանքի կարող են ապառիկ ձևակերպել:
Սակայն պարզվում է, որ այս ակցիայի կազմակերպիչները ոչ թե մարդասիրական նպատակներ են հետապնդում, այլ խաբեությամբ հնարավորինս շատ հաճախորդներ են փորձում ներգրավել:
«Հայացքը» «Վեգայի» հաճախորդներից ստացել է բողոքներ այն մասին, որ մարդկանց կանչում են խանութ, ժամերով սպասեցնում, իսկ վերջում համակարգչային ծրագիրը որոշում է, որ ապառիկն առանց կանխավճարի կամ առանց աշխատանքի վայրից տեղականքի հնարավոր չէ ձևակերպել:
«Եթե այդպես է, էլ ինչո՞ւ են մարդկանց խաբում, մոլորության մեջ գցում, հասցնում խանութ, ու վերջում պարզվում է, որ կանխավճար կամ աշխատավայրից տեղեկանք պետք է բերենք»,- բողոքեց հաճախորդներից մեկը: Նրա խոսքով` օրերս խանութում իրենք ընտրել են իրենց ցանկացած ապրանքը, մոտ 2 ժամ սպասել, որ ձևակերպեն, սական «Վեգայի» աշխատակիցները, կապվելով «Նորվիկի» հետ, պարզել են, որ անհրաժեշտ է տեղեկանք աշխատանքի վայրից և կանխավճար:
«Վեգա գրուպի» տնօրեն Մարինա Պողոսյանը պատասխանատվությունը «Նորվիկի» և իրենց հետ համագործակցող բանկերի վրա գցեց: Ըստ նրա` բանկերն են «հրավիրում» հաճախորդներին, բանկերն էլ մերժում են տարբեր պատճառաբանություններով: «Խանութի խնդիրը չի դա: Մենք մի շարք բանկերի հետ ենք համագործակցում, նրանք են հրավիրում հաճախորդներին: Մենք ասում ենք, որ կարող են մեզ մոտ գնումներ կատարել, բայց երբ հաճախորդը գալիս է, պարզվում է, որ նա վարկեր, պարտքեր և գրավադրված ոսկի ունի, բանկերը մերժում են: Խանութը ոչինչ չի կարող անել»,- ասաց նա: Այնուհետև Մարինա Պողոսյանը սկսեց թվարկել, թե ինչպիսին պետք է լինի իրենց խանութի հաճախորդը. «Հաճախորդը պետք է կարգապահ լինի, պարտքեր չունենա»: Ըստ նրա` «SMS-ը չի կարող ֆիլտրել պարտաճանաչ հաճախորդներին»: «Եթե մեկ հոգի դժգոհ է, ապա 50 հոգի բավարարված է գնում մեր խանութից»,- ընդգծեց «Վեգա գրուպի» տնօրենը:
Մեզ դիմած հաճախորդներից մեկը թեև մյուս բանկերում չունի վարկային պարտավորություններ և գրավադրված ոսկի, սակայն նրանից էլ «Նորվիկը» պահանջել է կանխավճար և տեղեկանք աշխատավայրից: Վարկային կազմակերպությունից փորձեցինք պարզել, թե ինչո՞ւ իրենց հաղորդագրությունները չեն համապատասխանում իրականությանը: «Մենք 0%-ից սկսած կանխավճար ենք սահմանում, չենք ասում, որ առանց կանխավճարի ենք գործարք կնքում: Կոնկրետ այդ հաճախորդը գրանցված աշխատող չէ, դրա համար էլ նրանից 15% կանխավճար ու աշխատաքի վայրից տեղեկանք ենք ուզել: Եթե մարդը նորմալ գրանցված աշխատող է, թուղթ պետք չի»,- պարզաբանեց «Նորվիկ» վարկային կազմակերպության ապառիկ վարկավորման մասնագետ Կարինե Վարդանյանը: Ըստ նրա` միայն անձնագրով ներկայանալը վերաբերում է միայն գրանցված աշխատողներին: Իսկ թե ինչո՞ւ այդ մասին հաղորդագրությունում չի նշվում, թե ինչո՞ւ են «Վեգա» զանգահարողներին հավաստիացնում, որ 0% կանխավճարով և առանց աշխատավարձի մասին տեղեկանքի կարող են ապառիկ ձևակերպել, այդպես էլ չմեկնաբանեցին: Իսկ շատ հաճախորդներ չիմանալով այդ մասին` գայթակղվում, գնում են SMS-ի հետևից և քայքայում իրենց նյարդերը` իրենց խաբված զգալով:
ՌՈԶԱ ՀՈՎՀԱՆՆԻՍՅԱՆ
Մեկնաբանել