Տեսանյութեր
Լուսանկարներ
Արցախ մուտք գործելու սահմանափակումները ավելի են խստացվել
Արցախի Հանրապետության պարետ, պետական նախարար Գրիգորի Մարտիրոսյանը ստորագրել է նոր որոշում, որով ավելի են խստացվում Արցախի Հանրապետություն մուտք գործելու սահմանափակումները: Այս մասին հաղորդում է Արցախի տեղեկատվական շտաբը:
Մասնավորապես, հունիսի 15-ից Արցախի քաղաքացիները (բացառությամբ մինչև վեց տարեկան երեխաների) Արցախի Հանրապետության տարածք մուտք գործելիս անցակետում Արցախի առողջապահության նախարարության աշխատակիցներին պետք է ներկայացնեն իրենց վերաբերյալ պոլիմերազային շղթայական ռեակցիայի (ՊՇՌ) թեստի դեպքում՝ երեք օրից ոչ ավելի վաղեմության, իսկ արագ (ռապիդ) թեստի դեպքում՝ երկու օրից ոչ ավելի վաղեմության COVID-19 թեստի պատասխանը:
Սույն կանոնից բացառություն կարող է արվել միայն պարետի ցուցումով՝ բացառիկ դեպքերում:
Թեստի պատասխանը բացասական լինելու և զննությամբ վարակի ախտանիշներ չհայտնաբերվելու դեպքում բոլոր անձինք ենթակա են ինքնամեկուսացման (բացառությամբ բեռնափոխադրում իրականացնող տրանսպորտային միջոցի վարորդի և մեկ ուղեկցողի):
Թեստի պատասխանը դրական լինելու կամ հատուկ զննությամբ վարակի ախտանիշների հայտնաբերման դեպքում այդ անձանց նկատմամբ կիրառվում է հոսպիտալացում և (կամ) այլ սահմանափակող միջոցառումներ:
Վերոնշված իրավակարգավորումը վերաբերում է նաև Աչցախի Հանրապետության քաղաքացի չհանդիսացող անձանց՝ այն տարբերությամբ, որ թեստի պատասխանը չներկայացնելու, թեստի դրական պատասխանի կամ հատուկ զննությամբ վարակի ախտանիշների հայտնաբերման դեպքում ընդհանրապես կարգելվի նրանց մուտքն Արցախի Հանրապետության տարածք:
Մեկնաբանել