HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Մանե Գևորգյան

Hero House կլինի ոչ միայն Երևանում, այլև Գլենդելում. նոր տեխնոլոգիական կենտրոնի պատմությունը

Երևանում գործող Hero House տեխնոլոգիական կենտրոնն իր հարկի տակ համախմբում է տեխնոլոգիական ձեռներեցությունը, գիտությունը և վենչուրային կապիտալը: Կենտրոնում գործում են SmartGateVC վենչուրային ֆոնդը, Հայաստանի ստարտափ ակադեմիան, Hero House-ի արհեստական բանականության ինկուբացիոն ծրագիրը, ինչպես նաև այլ նախաձեռնություններ, ստարտափ ընկերություններ և անհատներ:

Hero House-ը հիմնադրել են SmartGateVC վենչուրային ֆոնդի հիմնադիրները՝ EU-SMEDA ծրագրի աջակցությամբ։  «SmartGate-ը ներդրումներ է կատարում տեխնոլոգիական ստարտափների մեջ, ու մեր պորտֆելում ունենք 18 ստարտափ, որոնց մեծ մասը շատ բնականորեն ներկայություն է հաստատել նաև ԱՄՆ-ում։ Կալիֆոռնիա նահանգում, հատկապես Գլենդելում, որտեղ մեծ է հայկական համայնքը, շատ ջերմությամբ են մեր հայրենակիցներն ընդունում հայկական ստարտափներին և աջակցում՝ ինչով կարողանում են: Հայաստանում ունեցած մեր մի քանի տարիների փորձի արդյունքում, հասկացանք, որ կարող ենք Գլենդելում նույնպես ակտիվացնել հայ գիտական, ձեռներեցական և տեխնոլոգիական համայնքն ու ստեղծել նոր հնարավորություններ հայ ստարտափների համար»,- ասում է համահիմնադիր Համբարձում Քաղկեցյանը։

Արդյունքում՝ SmartGate վենչուրային ֆոնդը այս տարի Գլենդելում կհիմնի Hero House, որն իր գործունեությամբ նման կլինի Երևանի Hero House-ին։

Hye Rise Investments-ը և Ամերիկահայ ճարտարագետների և գիտնականների ընկերակցությունը (AESA) միանում են նախաձեռնությանը` որպես Hero House Glendale-ի ռազմավարական գործընկերներ:

Hero House Glendale-ը կսկսի իր գործունեությունը Gateway եռամսյա աքսելերացիոն ծրագրի գործարկմամբ, որը միտված է օգնելու արտերկրյա նորաստեղծ ձեռնարկություններին ընդլայնել իրենց գործունեությունը Հարավային Կալիֆոռնիայում։ Մեկնարկի համար SmartGateVC-ն Գլենդելի քաղաքապետարանից ստացել է 500 հազար ԱՄՆ դոլար դրամաշնորհ:

Համաբարձումը նշում է. «Սիլիկոնյան հովիտը բավականին հագեցած է ենթակառուցվածքների տեսանկյունից, ու դժվար է այնտեղ նոր բան ասելը, իսկ Լոս Անջելեսում շուկան նոր է զարգանում, և լավ հնարավորություն է տարբեր երկրներում հիմնադրված ստարտափների համար անցնել Hero House Glendale-ի Gateway աքսելերացիոն ծրագրով, ծանոթանալ շուկային, նոր կապեր հաստատել ու փորձառություն ձեռք բերել։ Հիմնական թիրախը Արևելյան Եվրոպայի երկրների ստարտափներն են»։

Hero House Glendale-ը ավելին է, քան մեկ ծրագիր։ Գործընկերների հետ միասին կաշխատեն բացառիկ հետազոտական ծրագրերի շուրջ համախմբել տեղական գիտական և ինժեներական ներուժը, Գլենդելում և հարակից շրջաններում զարգացնել վենչուրային կապիտալի և հրեշտակային ներդրումների մշակույթը և Hero House Glendale-ի շուրջ հիմնել հրեշտակային ներդրողների համայնք, Գլենդելի երիտասարդության և ուսանողների համար կազմակերպել և հյուրընկալել ձեռներեցական, ներդրումային և տեխնոլոգիական տարբեր միջոցառումներ, ինչպես նաև նախագծել և իրականացնել տեխնոլոգիական այլ ձեռներեցության ծրագրեր:

Համաբարձումն ավելացնում է. «Քչերը գիտեն, որ Disney-ը և Dreamworks-ը գտնվում են հենց Գլենդելում, իսկ Warner Bros-ը, Կալիֆոռնիայի տեխնոլոգիական ինստիտուտը և շատ այլ հրաշալի կազմակերպություններ և ընկերություններ այստեղից ընդամենը 15 րոպե հեռավորության վրա են: Չնայած Hero House Glendale-ը մեկնարկում է ձեռներեցների համար նախատեսված միջազգային ծրագրով՝ այն բարդ և բազմաշերտ նախագիծ է, որի մեջ ներգրավված են բազմաթիվ գործընկերներ և շահագրգիռ կողմեր: Մեր տեսլականն է առաջիկա 3-5 տարիներին դառնալ Լոս Անջելեսի լավագույն տեխնոլոգիական հանգույցներից մեկը: Հայկական տեխնոլոգիական համայնքի համար սա կարող է կարևոր ռազմավարական ծրագիր դառնալ և համապատասխան դերակատարություն ունենալ»:

Hero House Glendale-ին կաջակցեն նաև տեղական առաջատար տեխնոլոգիական ընկերություններ ServiceTitan-ը և DISQO-ն, Սիլիկոնյան հովտում հիմնադրված հայկական կազմակերպություններ HyeTech-ը և ՀԲԸՄ Սիլիկոնյան հովտի մասնաճյուղը, ինչպես նաև տեղական առաջատար համալսարաններ՝ Հարավային Կալիֆոռնիայի համալսարանը, Լոս Անջելեսում Կալիֆոռնիայի համալսարանը, և Կալիֆոռնիայի տեխնոլոգիական ինստիտուտը: Այս գործընկերներից յուրաքանչյուրը յուրահատուկ արժեք է բերում Hero House Glendale-ին և Գլենդելի տեխնոլոգիական էկոհամակարգին:

Այս նախաձեռնությունը թույլ կտա նոր կապեր հաստատել հայկական ստարտափների համար, Հայաստանը նորովի կներկայացնի աշխարհին. Լոս Անջելեսի՝ նոր տեխնոլոգիական կենտրոն դառնալու շրջանում Hero House Glendale-ը մեծ դեր կխաղա։ Սա կարևոր քայլ կլինի ցույց տալու համար, որ Հայաստանում սկիզբ առած ենթակառուցվածքային նախաձեռնությունը կարող է «արտահանվել» և էական նշանակություն ունենալ նաև ԱՄՆ-ում։

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter