«Facebook» սոցիալական ցանցը հեռացրել է ԱՄՆ նախագահ Դոնալդ Թրամփի քաղաքական ընտրարշավի գովազդներից մեկը։ Այդ մասին գրում է «The Washington Post»-ը։ Պատճառն այն է, որ գովազդում օգտագործվել է շրջված կարմիր եռանկյուն։ Սոցցանցերի օգտատերերը համարել են, որ այդ նշանը կապ ունի նացիզմի հետ։

Ֆաշիստական Գերմանիայում շրջված կարմիր եռանկյունն օգտագործվել է համակենտրոնացման ճամբարներում։ Այն հագուստին կրել են քաղբանտարկյալները, այդ թվում կոմունիստները, սոցիալիստները, անարխիստները և արհմիության ակտիվիստները։ Կարմիր եռանկյունով գովազդը տեղադրվել է Թրամփի և փոխնախագահ Մայք Փենսի, ինչպես նաև «Թրամփ թիմ»-ի պաշտոնական էջերում։ Մինչ ջնջվելը, Թրամփի էջում այն հավաքել է առնվազն 950 000 դիտում, իսկ Փենսի էջում՝ մոտ 500 000 դիտում։

BREAKING: President Trump is using an upside-down red triangle to Depict "fair-left' political groups in America. This EXACT symbol was used by Hitler and the Nazis to depict "political prisoners" in their concentration camps. THIS IS NOT OK! You hired him! Now fire him, GOP! pic.twitter.com/4BYldwXl4x

— Mrs. Krassenstein (@HKrassenstein) June 18, 2020

Շրջված կարմիր եռանկյունը երբեմն օգտագործվում է նաև հակաֆաշիստական շարժման ներկայացուցիչների կողմից։ Թրամփի թիմի ներկայացուցիչներից մեկը հայտարարել է, որ սիմվոլն օգտագործվել է հենց այդ նպատակով։ Գովազդային հայտարարության մեջ առաջարկվել է միանալ ստորագրահավաքի, որով արգելվելու է այն շարժումը, ինչին ավելի վաղ Թրամփն մեղադրել էր ընթացող բողոքի ցույցերի ժամանակ անկարգությունների կազմակերպման մեջ։ Բացի այդ, Թրամփը խոստացել էր շարժումը ճանաչել ահաբեկչական։ Թրամփի շտաբում, հայտարարության հեռացումից հետո, ակնարկել են այն հանգամանքը, որ շրջված կարմիր եռանկյան էմոջին կիրառվում է «Facebook»-ի կողմից և դասվում ստանդարտ սիմվոլների շարքին։

Ի սկզբանե ընկերությունում այն տեսակետն է եղել, որ սիմվոլը չի խախտում սոցցանցի կանոնները։ Ինչպես գրում է «The Washington Post»-ը, լրագրողները, որոնք ծանոթացել են աշխատակիցների ծառայողական հաղորդագրությունների հետ, ի սկզբանե օգտատերերի բողոքներին պատասխանել են, որ պատկերը չի խախտում հաղորդակցության չափանիշներին, իսկ ներքին շփման ընթացքում նշել են, որ եռանկյունը լայնորեն օգտագործվում է նամակագրության ժամանակ և առանց կոնտեքստի չի կարող դիտարկվել որպես ատելության խորհրդանիշ։ Այդուհանդերձ, արդյունքում որոշվել է ջնջել գրառումները։

Առաջին անգամը չէ, որ «Facebook»-ը ջնջում է Դոնալդ Թրամփի գովազդային հայտարարությունները։ Այսպես, դեռևս երկու տարի առաջ սոցիալական ցանցը արգելափակել էր մի տեսանյութ, որտեղ Մեքսիկայից Միացյալ Նահանգներ ժամանող փախստականները ներկայացվում էին որպես վտանգավոր հանցագործներ, որոնք սպառնում են ամերիկացիներին։ «Facebook»-ի ղեկավարությունն այն համարել էր ռասիստական։ 2020 թվականի գարնանը սոցիալական ցանցում արգելափակվել է Թրամփի ևս մեկ գովազդային արշավ՝ բնակչության մարդահամարի ոչ ճշգրիտ փաստ կիրառելու համար։

Լուսանկարը՝ «Associated Press» գործակալության