«Իմ քայլը» խմբակցության պատգամավորներ Աննա Կարապետյանը, Վլադիմիր Վարդանյանը, Վահագն Հովակիմյանը և Հայկ Գևորգյանն առաջարկում են հնարավորություն տալ ԱԺ պատգամավորին  քվեարկության մասին նախապես գրավոր տեղեկացնել, եթե վերջինս ժամանակավոր անաշխատունակ է ճանաչվել:

Պատգամավորները փոփոխություն են առաջարկում Ազգային ժողովի կանոնակարգ սահմանադրական օրենքում:

Գործող օրենքով` պատգամավորները նախապես կարող են տեղեկացնել քվեարկության մասին միայն այն դեպքում, երբ գործուղման են: Փոփոխություններով առաջարկվում է ժամանակավոր անաշխատունակության վիճակում գտնվող պատգամավորին հնարավորություն ընձեռել քվեարկել գրավոր: Նմանատիպ փոփոխություն է առաջարկվում նաև ԱԺ խորհրդի անդամի համար` քվեարկելիս, ինչպես նաև հանձնաժողովի անդամին` հանձնաժողովի քվեարկությունների ժամանակ:

Նշվում է, որ ժամանակավոր անաշխատունակության վիճակում գտնվող հանձնաժողովի անդամի ստորագրած գրությունը, ինչպես նաև օրենսդրությամբ սահմանված կարգով նրան տրված ժամանակավոր անաշխատունակության թերթիկը փակ ծրարով հանձնաժողովի նախագահին կամ նրան փոխարինողին պետք է հանձնվի հարցի քվեարկությունից առնվազն երեք ժամ առաջ:

Նախագծի հիմնավորումներում նշվում է, որ կորոնավիրուսի համաճարակը խորհրդարանի գործունեության համար նոր մարտահրավերներ է ստեղծել:

Փաստացի կարող է առաջանալ այնպիսի իրավիճակ, որ խորհրդարանի պատգամավորների մի մասը, բացառված չէ անգամ զգալի թվով, հնարավորություն չունենան խորհրդարանի աշխատանքներին ֆիզիկապես մասնակցել, ըստ այդմ, զրկվելով քվեարկելու հնարավորությունից:

Ստեղծված իրավիճակում առաջարկվում է կանոնակարգում ներդնել մի համակարգ, որը հիվանդության պատճառով ժամանակավորապես անաշխատունակության վիճակում գտնվող պատգամավորներին հնարավորություն կտա գրավոր կարգով քվեարկել: