Գեղարքունիքի մարզի դատախազի տեղակալն ու կինը դրամական միջոցներ չեն հայտարարագրել
Գեղարքունիքի մարզի դատախազի տեղակալ Վարդան Լազարյանն այն եզակի պաշտոնյաներից է, որ նույնիսկ 1 դրամ չի հայտարարագրել, որպես կանխիկ կամ բանկային հաշվին ունեցած դրամական միջոց:
Բարձրաստիճան դատախազի 2019թ․-ի հայտարարագրի համաձայն, նա դրամական միջոցներ չունի, իսկ եկամուտները կազմում են 8 մլն 866 հազար դրամ, որոնք գոյացել են դատախազությունից, Գավառի պետական համալսարանից ստացած աշխատավարձերից, ինչպես նաև ոստիկանությունից ստացած կենսաթոշակից:
Ինչ վերաբերում է գույքին, Վարդան Լազարյանը Գեղարքունիքի մարզի Դրախտիկ համայնքում կնոջ հետ համատեղ սեփականության իրավունքով ունի առանձնատուն, որը ձեռք է բերել 2018թ-ին: Պաշտոնյան հայտարարագրել է նաև 2000թ. արտադրության MERCEDES-BENZ մակնիշի ավտոմեքենա, որը դարձյալ ձեռք է բերել 2018-ին:
Նույն ժամանակահատվածում 4 մլն դրամով Վ. Լազարյանն ու կինը օտարել են իրենց բնակարանը:
Պարզվում է, 2018թ. բավականին «նպաստավոր» տարի է եղել Վարդան Լազարյանի համար: Ըստ այդ տարվա հայտարարագրի՝ 25 մլն դրամով ձեռք է բերել բնակարան: Կնոջ՝ Մերի Կիրակոսյանի հետ համատեղ ձեռք է բերել անհատական բնակելի տուն, որի արժեքը հայտարարագրում նշված չէ:
Այս հանգամանքը մեր ուշադրությանն արժանացել էր դեռևս 2018-ին: Այդ ժամանակ գլխավոր դատախազության հանրային կապերի բաժնի պետ Արևիկ Խաչատրյանը մեր գրավոր հարցմանն ի պատասխան տեղեկացրել էր, որ առանձնատան գինը նշված չէ, քանի որ համատեղ սեփականության իրավունքով հողամասի վրա բնակելի տունը կառուցվել է սեփական միջոցներով: Նշենք, որ տունը գտնվում է Գեղարքունիքի մարզի Շողակաթ համայնքում:
Շորժա համայնքում Մերի Կիրակոսյանը միանձնյա սեփականության իրավունքով ունի նաև հողամաս:
«Ինչ վերաբերում է Վարդան Լազարյանի կողմից շուրջ 25 մլն դրամ արժողությամբ բնակարան ձեռք բերելու հանգամանքին, ապա հայտնում ենք, որ Երևան քաղաքի Քանաքեռցու… հասցեում գտնվող անշարժ գույքի առուվաճառքի և գրավի, հիպոթեքի պայմանագրի հիման վրա նշված անշարժ գույքի նկատմամբ 16.11.2018թ. գրանցվել է Վարդան Լազարյանի որդու և վերջինիս կնոջ ընդհանուր համատեղ սեփականության իրավունքը: Անշարժ գույքի առուվաճառքի և գրավի, հիպոթեքի պայմանագրի համաձայն՝ Վարդան Լազարյանը հանդիսացել է համավարկառու: Այսինքն բնակարանի դիմաց Լազարյանի կողմից վարկի վճարում չի կատարվել, այլ նշված արժեքի չափով համավարկառու է հանդիսացել»,-նշված է դատախազության պատասխանում:
Ուշագրավն այն է, որ դատախազի որդու՝ Գերասիմ Լազարյանի 2018թ. հայտարարագրում թեև երևում է, որ անշարժ գույքի գործարք եղել է, սակայն որևէ բառ անգամ չկա, թե ինչ գույքի վերաբերյալ է կայացել գործարքը, վաճառվել է, թե գնվել կամ՝ ինչ արժեք է ունեցել: Տողի տվյալը փակ է և կատարվել է նշագրում. «Պաշտպանված»: Գերասիմ Լազարյանի բնակարանն արդեն երևում է 2019թ-ի հայտարարագրում:
Նշենք, որ Վարդան Լազարյանի որդին՝ Գերասիմ Լազարյանը ևս աշխատում է դատախազությունում: Նա վարորդ է, և 2019թ. նրա միակ եկամուտը եղել է ստացած շխատավարձը՝ 1 մլն 400 հազար դրամ:
Գ. Լազարյանը հայտարարագրել է նաև KIA մակնիշի ավտոմեքենա, որը ձեռք է բերել 2017թ-ին:
Իսկ Վարդան Լազարյանի կինը՝ Մերի Կիրակոսյանը, զբաղվում է ձեռնարկատիրական գործունեությամբ, որի արդյունքում 2019թ-ին ստացել է 3 մլն 500 հազար դրամի եկամուտ: 2018-ին նրա ձեռնարկատիրական գործունեությունից ստացած եկամուտը մոտ 1 մլն դրամ է եղել:
Ինչ վերաբերում է դրամական միջոցներին, Մերի Կիրակոսյանը ամուսնու նման ոչ մի դրամական միջոց չի հայտարարագրել:
Մեկնաբանել