Կորոնավիրուսի համաճարակի պայմաններում պատգամավորների բացակայությունները հարգելի են համարվում բացակայած պատգամավորների ներկայացրած և ԱԺ նախագահի հաստատած դիմումների հիման վրա: Այս մասին տեղեկանում ենք խորհրդարանից ստացված մեր գրավոր հարցման պատասխանից:

Մենք հետաքրքրվել էինք, թե ԱԺ աշխատակազմն ինչ չափորոշիչների հիման վրա է այս պայմաններում բացակայությունները հարգելի համարում: ԱԺ աշխատակազմի ղեկավարի տեղակալ Լիլիթ Մինասյանը մեզ հետ զրույցում ասաց, որ չափորոշիչները տարբեր են, օրինակ` ուղեկցող խրոնիկ հիվանդությունների մասին գրավոր տեղեկանքը:

ԱԺ աշխատակազմից տեղեկացրել են նաև, որ պատգամավորների աշխատավարձերից պահումներ կատարվել են նաև արտակարգ դրության հաստատումից հետո` հերթական, արտահերթ ու հանձնաժողովների նիստերից անհարգելի բացակայությունների համար:

Հիշեցնենք, որ մի քանի պատգամավորներ շրջանառության մեջ են դրել նախագիծ, որը հնարավորություն է ընձեռում պատգամավորներին քվեարկության մասին գրավոր տեղեկացնել, եթե վերջիններս ճանաչվել են ժամանակավոր անաշխատունակ:

Առայժմ հայտնի է երեք պատգամավորի կորոնավիրուսի թեստի դրական արդյունքների մասին, կան նաև ինքնամեկուսացած պատգամավորներ:

Լուսանկարում՝ ԱԺ նախագահ Արարատ Միրզոյանը