Խորհրդարանի արտահերթ նիստում քննարկվում է 2019 թվականի պետական բյուջեի կատարման նախագիծը: ԱԺ Պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանն իր ելույթում ափսոսանք հայտնեց, որ նիստին ներկա չէ «Բարգավաճ Հայաստան» խմբակցությունը:  Քոչարյանն անդրադարձավ վերջին օրերին քննարկվող կառավարության թվացյալ անհաջողություններին, որոնց մասին բարձրաձայնում էր խորհրդարանական երկրորդ ուժը` պահանջելով Կառավարության հրաժարականը:

«Այս քննարկումների արդյունքում ես օրվա մեջ մի քանի անգամ իրավասու անձանց հետ քննարկում էի` սով լինելու է, թե՞ չէ: Վերջին շրջանում սկսեցին հայտնվել բայղուշներ և անել բայղուշություններ, առաջին մեծ բայղուշությունն արեց համազգային փեսան (նկատի ունի Սերժ Սարգսյանի փեսա Միքայել Մինասյանին-հեղ.), երբ իր սերիալներից մեկում անդրադարձ կատարեց անվտանգության ոլորտին ու բանակի վերջին ձեռքբերումներին»,-ասաց Քոչարյանը:

Նրա խոսքով` ի հայտ են եկել փորձագետներ, որոնք իրենց ելույթներով սկսել են վտանգել երկրի անվտանգությունը:

«Հասանք այն աստիճանի, որ պատերազմող  երկի հակառակորդին հուշեցինք, որ կարող են սկսել հարձակումներ: Ուզում եմ մեր այս ընկերներին հիշեցնել` դուք, ըստ էության, պատերազմ եք հայտարարում մեր սեփական ժողովրդին, բայց այդ պատերազմում արդեն պարտվել եք»,-ասաց Անդրանիկ Քոչարյանը:

 Ըստ Պաշտպանության և անվտանգության հարցերի մշտական հանձնաժողովի նախագահի` պաշտպանության նախարարությունը քանակական ու որակական չափանիշներով ոչ միայն իր առջեւ դրած խնդիրները լուծել է, այլ ավելին` ունենք ձեռքբերումներ: Քոչարյանի խոսքով` այդ ձեռքբերումները նկատել է նաև հակառակորդ երկրի պաշտպանության նախարարը:

Անդրանիկ Քոչարյանը համոզմունք հայտնեց, որ նախորդ տարվա բյուջեի կատարողականի համաձայն` անվտանգության ամբողջ համակարգում կան ձեռքբերումներ:

Քոչարյանն անդրադարձավ նաև 2016 թվականի ապրիլյան պատերազմի դեպքերը քննող հանձնաժողովի աշխատանքին` ասելով, որ զեկույցը սեպտեմբերին կուղարկեն ԱԺ նախագահին, ապա կորոշեն, թե ինչպես հանրությանը ներկայացնել դրա փակ և բաց մասերը: