Ամերիկացի ռեփեր Քանյե Ուեսթը մտադիր է մասնակցել ԱՄՆ նախագահական ընտրությունների մրցավազքին։ «Հավատալով Աստծուն՝ մենք պետք է իրականացնենք Ամերիկային տված խոստումը. միավորել մեր տեսլականը և կառուցել մեր ապագան։ Ես առաջադրելու եմ իմ թեկնածությունը ԱՄՆ նախագահական ընտրություններին»,- հուլիսի 4-ին Թվիթերի իր միկրոբլոգում գրել է Քանյե Ուեսթը։

Ուեսթն իր գրառումն ուղեկցել է #2020VISION հեշթեգով, սակայն որևէ այլ մեկնաբանություն չի տվել։ Նոյեմբերի 3-ին կայանալիք ԱՄՆ նախագահական ընտրություններին մնացել է 4 ամսից պակաս ժամանակ։

We must now realize the promise of America by trusting God, unifying our vision and building our future. I am running for president of the United States ??! #2020VISION

— ye (@kanyewest) July 5, 2020

Առաջին անգամը չէ, որ ամերիկացի ռեփերը հայտարարել է երկրի նախագահի աթոռի նկատմամբ իր հավակնությունների մասին։ Դեռ 2015 թվականին MTV Video Music Awards մրցանակաբաշխության ժամանակ՝ Ուեսթը հայտարարել էր, որ մտադիր է մասնակցել 2020 թվականի ընտրություններին։ Այդուհանդերձ, Ուեսթն ամերիկացի այն եզակի մշակութային գործիչներից մեկն է, որն աջակցում է նախագահ Թրամփին։

Սպիտակ տան գործող ղեկավար հանրապետական Դոնալդ Թրամփի հեղինակությունը, որը հայտարարել է նախագահական մրցարշավին իր մասնակցության մասին, վերջին շաբաթներին կտրուկ անկում է գրանցել։ Փոխարենը բարձրացել է դեմոկրատական կուսակցության թեկնածու, նախկին փոխնախագահ Ջո Բայդենի հեղինակությունը։

You have my full support!

— Elon Musk (@elonmusk) July 5, 2020

Մինչ այս պահը թեկնածուները չեն մեկնաբանել Ուեսթի հայտարարությունը։ Միաժամանակ, Ուեսթին իր աջակցությունն է հայտնել «Tesla» և «SpaceX» ընկերությունների ղեկավար Իլոն Մասկը։

Լուսանկարը՝ Michael Wyke/ AP