ԿԸՀ-ն մերժեց «Լուսավոր Հայաստանի» դիմումը` վերականգնել իրենց մեկ մանդատը
Կենտրոնական ընտրական հանձնաժողովը (ԿԸՀ) միաձայն մերժեց «Լուսավոր Հայաստան» խմբակցության ղեկավար Էդմոն Մարուքյանի դիմումը` խմբակցության մեկ մանդատը վերականգնելու համար:
Մարուքյանը դիմել էր ԿԸՀ` ցանկանալով անկախ պատգամավոր Արման Բաբաջանյանին տրված մանդատը չեղարկել: Հիշեցնենք, որ Բաբաջանյանը դուրս է եկել խմբակցությունից` հանդես գալով որպես անկախ պատգամավոր: «Լուսավոր Հայաստանն» էլ դիմել էր ԿԸՀ` պնդելով, որ այդ կերպ ընդդիմության 1/3-ի համամասնությունը խախտվել է, ուստի պահանջում է իր մեկ մանդատը:
Այսօրվա հրավիրված նիստում ԿԸՀ նախագահ Տիգրան Մուկուչյանը նշեց, որ խմբակցությունը ներկայացրել է դիմում, որով պահանջում է տրամադրել լրացուցիչ մանդատ:
«ԿԸՀ-ի կողմից մանդատների բաշխումը տեղի է ունենում մեկ անգամ, ըստ ԸՕ-ի, արդյունքները ամփոփելուց հետո: Արդյունքներն ամփոփվել են, հստակ բաշխվել են մանդատները: ԿԸՀ-ն այլ անձանց մանդատ տրամադրելու իրավասություն ունի բացառապես թափուր մանդատ առաջանալու պարագայում»,- ասաց Մուկուչյանը:
«Լուսավոր Հայաստան» խմբակցության դիմումը ներկայացրել էր կուսակցության անդամ Դավիթ ԽաԺակյանը, ում խոսքով` դիմել էին ԿԸՀ խորհրդարանական ընդդիմության 1/3 համամասնությունը վերականագնելու համար: Նրա խոսքով` դա կարող էր լինել և հավելյալ մանդատի տրամադրման ճանապարհով, և Արման Բաբաջանյանին` այս կամ այն մանդատը վայր դնելու պարտավորեցման ճանապարհով:
Խաժակյանը հիշեցրեց, որ Բաբաջանյանն այս խորհրդարանում ամենաքիչ ձայներ ստացած պատգամավորն է՝ շուրջ 300 ձայն, հետևաբար պատգամավոր է ընտրվել իրենց կուսակցության համամասնական ցուցակով: Նրա խոսքով` Բաբաջանյանը պետք է կուսակցություն ձևավորի ոչ այլ կուսակցությանը տրված մանդատի հաշվին:
Խաժակյանը չբացառեց, որ կվիճարկեն ԿԸՀ որոշումը:
Մեկնաբանել